El tríu nuevu de música tradicional, La Bedur, entama un crowdfunding y presenta’l so primer tema

Va unes selmanes presentóse a traviés de les redes sociales La Bedur, un tríu nuevu de música tradicional asturiana formáu por tres músicos bien esperimentaos de la escena: Miguel Rodríguez Monteavaro (flauta travesera), Pepín de Muñalén (vigulín) y Rodrigo Roces Nuño (pianu). Esti proyectu tien influencies d’otros sones como’l bal-folk, jazz, pop, celta o la clásica contemporánea y quier asoleyar pa la seronda de 2024 el so primer trabayu en forma de llibru-discu. Pa ello necesiten 3.500 euros y entamen una campaña de micromecenazgu en Verkami, plataforma na que se pue ver el videoclip del so primer tema: “Lo suelto“.

«La idea principal del grupu ye la de revisitar los vértices y los bordes de la música de raíz d’Asturies y los territorios d’alredor p’amostrar al públicu una nueva posibilidá estética dientro de la gran etiqueta de música tradicional o música folk», desplica’l tríu na presentación del crowdfunding. Amás, destaquen que nagüen «por dar una nueva vida a la tradición dende un puntu de vista actual» y pa ello ye clave la instrumentación na que «el pianu, la flauta travesera de madera y el vigulín axúntense a la hora de crear un espaciu poco transitáu pola música contemporánea asturiana».

Un exemplu d’esta propuesta ye “Lo Suelto”, el primer videu qu’estrenen baxo la realización de Cortexiphan Producciones nel que se pue sentir «música pa escuchar y baillar por disfrute na actualidá». La formación alcuéntrase agora mesmo grabando esti trabayu que va asoleyar en formatu dixital y que «físicamente va tener forma de llibru didácticu, con una estructura empobinada a la divulgación del repertoriu tradicional». El volume va cuntar tamién con testos lliterarios de Xuan Bello, Lorena Souto, Hedoi Etxarte y Javier de Pendia. La maquetación va ser obra de Ediciones Trabe y la edición de ATEM, el sellu de los hermanos Andres y Miguel Montevaro, venceyáu a l’Asociación Mezá y que yá tien asoleyaos trabayos como A música tradicional del Eo-Navia de Caldo y Os Rabizos.

El nome

«N’Asturies, la bedur, coles variantes asturianes de nome, ye un árbol que sirvió y sirve pa infinidá d’usos y que ye bien apreciáu pol so medrar rápido y pola so adaptabilidá a los terrenos», desplica esti tríu que garra’l nome del «posiblemente xunto’l carbayu, la faya y la castañal, l’árbol más característicu de toa Europa». Pa qu’esti árbol sonoru siga medrando, a la campaña de crowdfunding falta-y algamar un 62% de la financiación. N’abril remata’l micromecenazgu que se pue sofitar aportando dende 10 € hasta 1.000 € y pa ello recibir unes recompenses nes qu’hai unidaes del discu, convite a la presentación y un conciertu.

Dexa un comentariu

X