El vienres 31 de xunetu arrancó la 55 edición del Festival Interceltique Lorient, l’eventu más prestixosu del mundu celta. La delegación asturiana ta formada esti añu por 150 persones y a lo llargo d’estos primeros díes yá amosó’l bon nivel de la música asturiana n’eventos como troféu MacCrimmon de gaita, l’espectáculu Horizons Celtiques, el Gran Desfile de les Naciones Celtes, o la recepción institucional que se fizo esta mañana nel Ayuntamientu de Lorient a toles delegaciones. Amás, tres de la actuación de Ferla Megía’l sábadu, dende esta tarde continúen los conciertos d’artistes coles actuaciones a lo llargo la selmana d’Entós, Rellume, Llevólu’l Sumiciu, Rubén Alba y Herbamora.
Asturies lleva 40 años participando nel Festival Interceltique Lorient y yá fueron dellos los años qu’esti eventu bretón dedicó la so edición al nuestru país. Pa festexar esti aniversariu, la delegación asturiana fizo esti añu una propuesta artística qu’apuesta sobre manera poles bandes moces y los soníos nuevos de la música n’asturianu, xunto a les agrupaciones tradicionales Banda Gaites El Gumial d’Ayer, Grupu Etnográficu L’Oriente y la banda gaites Llacín; amás de la formación madrilana d’orixe asturianu Banda Gaites La Tarabica.
Estos primeros díes de festival arrancaron con puxu pa la música asturiana. Los gaiteros Diego Lobo y Pelayo Suárez quedaron segunda y tercera posición na 39ª edición del troféu MacCrimmon de gaita; les bandes de gaites El Gumial, Llacín y el Grupu Etnográficu L’Oriente rellumaron nel espectáculu Horizons Celtiques y nel Gran Desfile de les Naciones Celtes -nel que tamién participó La Tarabica– y esta mañana los ganadores del II Premiu Obdulia Álvarez «La Busdonga» d’Asturianada –Alicia Villanueva, Néstor Díaz y Esteban Verdeja– llevaron, per vez primera, la tonada al festival actuando na recepción institucional que fizo l’Ayuntamientu de Lorient a toles delegaciones. Ellí tamién tuvo presente la conseyera de Cultura, Política Llingüística y Deporte, Vanessa Gutiérrez, que representa al gobiernu asturianu nesti prestixosu eventu.
El músicu vanguardista Ferla Megía -ganador del XVII Premiu Camaretá al Meyor Cantar- foi l’encargáu d’abrir el sábadu los conciertos d’artistes asturianos na 55 edición d’esti festival. A ellos van sigui-y dende güei una montonera d’actuaciones d’otros nomes d’esta escena: Entós, Rellume y Rubén Alba (llunes 3), Llevólu’l Sumiciu (martes 4, miércoles 5 y xueves 6), Rubén Alba (llunes 3) y Herbamora (xueves 6 y vienres 7). La presencia asturiana complétenla Iñaki Santianes que, amás de ser el responsable del festival n’Asturies, actúa’l miércoles 5 dientro del espectáculu especial L’Irlande Symphonique y el gaiteru Diego Lobo, que va poner una masterclass tamién el miércoles.
Suscríbite a les nuestres novedaes
