Miscelánea musical nesti fin de selmana

Entama un fin de selmana con una veintena de conciertos y actuaciones de música asturiana, con estilos bien estremaos, y espardíos pel territoriu

Eventos

Llega un fin de selmana que mos ufierta bona variedá de música n’asturianu; espardía pol territoriu y con estilos bien estremaos.

Entamamos el vienres 22 cola actuación de la bandina La Garrapiella en Cangues d’Onís, na Casa de Cultura a les 21.00h. Esa misma nueche, pero en Llaviana, vamos poder sentir al grupu Rellume n’Entrialgo, a les 22.00h nos Xardines Palacio Valdés. Pal occidente tamién tendremos actividá, na menos que col entamu de la primer xira de La Guinda n’Asturies. La cita va ser a les 22.30h na Taberna Narciso, en Teberga (Samartín).

Pasamos al sábadu 23 y vamos pa Baíña, que son les fiestes, y ellí van tar la Bandina Los Collaínos faciendo dos pases, ún a les 18h y otru a les 20h. Lluéu, a les 22h, entamen los conciertos protagonizaos pol rock, con un cartelu formáu por la banda más veterana del rock astur, Dixebra, y el grupu punk-folk Skontra, xunto al tríu Sacavera. Cuatro bones razones pa quedase na zona centro.

Pero tamién hai mui bones razones pa dir pal oriente: dientro de la programación del LIII Certamen del Quesu Carbales, topámonos con un conciertu de Vicente Díaz a les 22.00h nel Parque Públicu d’Arenas de Cabrales, y más pal norte, en Porrúa, va a tentanos la programación qu’ufierta el so mercáu: El sábadu 23 d’agostu, un pasacáis entama a les 12.30h, con presencia de músicos y grupos folclóricos. A les 12.45h, Héctor Braga va ser l’encargáu de facer el pregón, y dempués, el grupu Filandón va tar baillando, a les 13.00h y a les 14.30 h.

Pela tarde, a les 17.30h va haber otru pasacáis con música, y a les 18.00h, actúa la Bandina Llacín. Xusto dempués, a les 18.45h, l’Asociación d’Intérpretes de Canción Asturiana va ufrir una muestra de tonada, y Filandón van tar baillando otra vegada durante la tarde. A les 20.00h, va tener llugar un conciertu nel que participen los Gaiteros de Llacín, el Grupu Etnográficu L’Oriente, Trebeyu y Los Gascones.

Si llegamos con fuercies al domingu 24, y vamos llegar, podemos dir pa Nava a ver a La Guinda, por si nun nos pudimos averar al conciertu del vienres. Esta segunda oportunidá va ser nel CSA L’Apiaderu, en Nava. Ya nun hai excuses. Y lo mismo pasa con Vicente Díaz, que va tar nel Regodón, en Llaviana, dando un conciertu a les 13.30h. Dempués, podemos tornar pa Baíña pa sentir a Femfarria Asturies Combo, a les 19h. Y si tamos más pal occidente, Anabel Santiago xunto a Andy da Silva van dar un conciertu en Salas, a les 19.30h nel Pabellón de La Veiga.

Otra opción recomendable ye dir al IX Mercáu Artesanal de les Fiestes El Pote. Ellí, pela mañana van actuar L’Agrupación de Etnografía y Folclore L’Esperteyu, y pela tarde la Bandina de Gaites Valle del Nalón. A les 18h hai un taller de baille asturianu impartíu por Luis Ángel Fernández Santos (Prau Llerón) y a les 19.30h conciertu de Pandereteros d’Anguañu.

Y si somos de los que prefieren vivir un festival o una fiesta por completu, quedámonos en Porrúa, nel segundu día de mercáu, onde entama’l día otru pasacáis, a les 12.30h. Héctor Braga va tar pregonando a les 12:45, y Filandón van baillar a les 13.00h y a les 14.30h. Pela tarde, pasacáis a les 17.30h y pregón con Héctor Braga a les 17:45. A les 18.00 ye’l turnu de Gaiteros de Llacín, siguíos de Filandón a les 18.40h y a les 20.30h, y pela nueche, a les 21.30h, miembros de la A.C. Llacín van tocar música pal baille.