Misiva sigue en pie de xera

La nueche del sábadu, anque bien lluviosa, anunciábase prometedora col conciertu del 10+2 aniversariu de Misiva na Sala Gong Galaxy Club d’Uviéu, nun espéctaculu que, como ellos mesmos dixeron al entamu, precisaben enforma. 

La sala abría les sos puertes a les 21:30 hores, con un públicu nel que se podíen ver cares conocíes del mundu de la música asturiana, ente otros, qu’aguardaba a la entrada y que diba dir medrando según pasaben los minutos. Casi una hora dempués, Los Bárcenas, grupu bien cañeru col que yá compartiera escenariu Misiva nel Kuivi Pop Up d’Uviéu’l branu pasáu, diba dar anuncia del entamu del espectáculu, quitando la povisa d’un conciertu que yá s’anunciara va dos años y que, por mor del andanciu, nun se pudiera facer. Mientres casi una hora, el grupu fixo la espera más amena con dellos temes clásicos del hardcore y del punk, talos como Come on de The Hives, Do Want you Want de Bad Religion o Bro Hymn de Pennywise col que zarraron la so actuación.

Tres esti aniciu de la nueche con Los Bárcenas, llegaba’l tiempu de camudar los instrumentos y preparar la escena de Misiva mientres que’l públicu rellenaba los sos vasos de cerveza. Unos minutos dempués de que’l reló marcara les 23:30 hores, Misiva daba entamu al so conciertu del 10+2 aniversariu con un tema del so últimu EP, Héroes ensin nome. Humberto, voz del grupu, glayó que yera un momentu de felicidá pa la banda poder volver tocar con normalidá dempués de más de dos años ensin defender los sos temes nel escenariu, nun conciertu que diba tar marcáu por un repertoriu de clásicos del grupu xunto con temes de los últimos discos. Bromiaba tamién col “fríu” que se respiraba na sala y pidía que tizaran la cocina de lleña pa entrar en calor. 

Asina diba ser nos siguientes minutos, con un públicu que s’animaba a cada vegada que sonaba un cantar nuevu. Misiva tuvo alcordanza de lo qu’anguaño ta asocediendo n’Ucraína mientres el cantar Bombes y darréu, Humberto agradeció’l sofitu a profesores y alumnáu del institutu onde trabaya, l’IES Dr. Fleming d’Uviéu y que taben presentes na sala col cantar El llau escuru. Los agradecimientos nun diben aparar equí y con Siempre fiel el grupu quixo agradecer tol sofitu de la xente que ta col grupu dende va 12 años, cuando empezaron.

Tanto’l públicu como la banda entregaos al punk-rock, llegó’l momentu de presentar el cantar qu’asoleyara Misiva va unes selmanes, un tema homónimu que calificaron d’homenaxe a tolos que sofiten el grupu. Los agradecimientos siguíen apaeciendo n’escena y esta vegada yera pa la xente que ficiera posible tola so xera. Pidiendo perdón por si faltaba daquién, Misiva alcordóse de Quiroga, Dani Sevillano, El Garaje Producciones o Titi Muñoz, ente otros, y dedicó-yos Semiente y Bales.

La música n’asturianu siguía sintiéndose col micru pel públicu mientres entamaben a sonar los acordes d’Invencibles, un tema que quixeron dedicar a toles bandes qu’acompañaron a Misiva nos postreros doce años, compartiendo escenariu colos dos cantantes del grupu asturianu de moda, Desakato. Los hermanos Pablo y Pepo ficieron que’l conciertu llegara al so puntu álxidu. La nueche taba llegando a la so fin, pero aínda faltaben clásicos y la xente sabíalo.

Enantes de despidise y con Patxi, cantante de Los Barcenas, acompañando a Misiva nel escenariu, diben cantar Punk Rock, agradeciendo una nueche tan abellugosa. Sicasí, el públicu tovía precisaba más temes del repertoriu y, faciéndose de rogar más bien poco, Humberto, Oscar, Nosty y David tornaben al escenariu pa rematar la nueche con otros tres temes. Revolución TV diba ser el primeru, pero tres él, llegó’l momentu de reivindicación de la nueche, onde tola sala glayó de nueves pola oficialidá de les llingües propies d’Asturies y llanzando un mensaxe de que “falar n’asturianu fai que nos sintamos menos foriatos na nuesa ciudá”.

L’espectáculu d’una nueche que tanto Misiva como la xente que tuvo ellí presente nun van escaecer diba rematar con un clásicu de los Bad Religion tornáu al asturianu, Rapaz Refalfiáu, non ensin antes volver a agradecer los doce años de música que lleva la banda. La música n’asturianu ta más viva que nunca y Misiva amosólo’l sábadu n’Uviéu. Y ye que, como dixo Patxi, de Los Barcenas, tovía hai Misiva pa rato. Por otros doce años más.

Mira les semeyes del conciertu

Comprar discos de Misiva na tienda online