Manches y arguyu: Working Class

Sábadu 15 de marzu, 18.10, paro a echar gasolina poco enantes de garrar la desviación pal Valle de Turón. Pensé: “Bueno, güei voi con tiempu. Aparco, doi una vuelta y pruebo a facer un par de fotos perhí enantes de qu’entamen”. Curva pequí, curva p’allá… y veo’l típicu escenariu industrial, un par de castilletes, un edificiu grandón… ye equí. Al pasar per delantre la valla miro a mano derecha y… pum. Cola pa entrar, y grande. Meca, “pues va ser que nun díbemos tan bien de tiempu”. Unos metros más p’alantre, una pila coches tremenda; ensin sitiu p’aparcar. Consigo dexalu ensin qu’estorbara demasiao y póngome a caminar pa la entrada. Voi pensando: “pero si yo imaxinaba que diba ser daqué más pequeño… Un escenariu con unes cuantes silles delantre y fuera. Si amás agotáronse les entraes en minutos, nun debía haber munches…”. Faigo cola con Claudia y Gabriel, tópolos al llegar. Enantes de pasar pa dientro dícennos que tuvimos suerte, porque queden unos pocos sitios pa sentase.

Nuna parte l’escenariu vense picos y cascos, y un monu colgáu. Un proyector enllena la paré de fondu col cartel del conciertu y otru focu proyecta la solombra de la ropa nun llateral. Sal a presentar el conciertu Rocío Antela, Conceyala de Cultura nel Ayuntamientu de Mieres, pero non solo eso. Minera, Inxeniera Técnica de Mines y feminista. Fálanos del espaciu que ye’l PZSB (Pozu Santa Bárbara) y cuéntanos que nesti eventu hubo muncha más xente involucrada de la que podemos pensar, y amás, persones y asociaciones que se volcaron voluntariamente. Fálanos de los bancos nos que ta sentada la xente, dalgunos usábenlos nesti y otros pozos. Fálanos de los coxines qu’hai enriba d’ellos, toos azules; azul mahón.

Tres d’ella sal Mª Fernanda Fernández Gutirérrez, Historiadora del Arte y guía oficial de turismu, quien formó parte del equipu que preparó l’informe gracies al que’l PZSB ye Bien d’Interés Cultural. Siguiendo la intervención de Rocío, que destacó tamién el valir de recuperar espacios pa los trabayadores, Mª Fernanda señaló lo qu’entá nos queda por conocer d’esta tierra y de la so hestoria, y apuntó a la importancia d’esti tipu d’espacios nesi procesu.

Miro pa los llaos. Too lleno. Pues paez que nun había poques entraes y sí muncha gana de venir, coincidiendo tovía col antroxu en danza en L’Infiestu (porque sí, n’Asturies hay una montonera d’eventos y muchos findes nun podemos dir a too, pero a vegaes nun somos conscientes d’ello).

«A base de versión ya improvisación, presenten temes de diferentes artistes y diferentes décades que cunten toos la mesma hestoria: la del pueblu, la de la working class»

Suben al escenariu Mapi, Rubén y Marcos Baggiani. Rubén garra la guitarra (tamién ta perhí’l so vigulín), Marcos siéntase na banqueta, detrás de la batería, y Mapi queda a la izquierda; detrás tien un sintetizador (un vocoder, en concreto). Arranca’l conciertu. A base de versión ya improvisación, presenten temes de diferentes artistes, de diferentes décades, pero que, falando de coses estremaes, nun son distintos. Temes que cunten toos la mesma hestoria: la del pueblu, la de la working class.

Entamaron con una versión de ‘Como pájaros en el aire’, de Peteco Carbajal, pa siguir cola que fizo Pedro Aznar de ‘El Seclanteño’ (Ariel Ptrocelli). ‘Encontros e despedidas’, de Milton Nascimiento, tamién pasó pola “versionaora” que manexen estos tres pedazu de músicos. Siguió la ‘Suite de la Cuenca’, xermen d’esti proyectu, un medley qu’axunta tres temes de Nuberu y una improvisación que lleva por títulu ‘Renault 21’, y que presentara Mapi va un añu nel homenaxe al Nuevu Canciu Astur. Les versiones de ‘Construçao’ (Chico Buarque) y ‘Pablo Pueblo’ (d’un tal Rubén Blades, como dixo Mapi) foron la parte final del conciertu. Toles lletres que taben en llingües de fuera foron tornaes y cantaes n’asturianu por Mapi. Acompañando tol repertoriu, y dando-y un calter tovía más reflexivu, apaecíen imáxenes proyectaes detrás l’escenariu, con diferentes paisaxes, mesmo rurales qu’urbanos, viviendes mineres, animales, persones qu’habiten esos espacios…

Nun voi entrar en munchos detalles musicales por delles razones: porque paga más la pena dir a velo que lleelo, y porque lo que faen estos músicos ye difícil de tresmitir. Cuando sientes a Mapi improvisar y xugar cola voz, pienses “Y ahora, ¿cómo cuento yo esto a los que me van preguntar qué tal tuvo?”. Pues ná, dicir que canta con una fuercia y con una elegancia tala que quedes como a puntu de respigate. Un turullu vocal metíu en mediu d’una improvisación, un xugar coles dinámiques que ye siempre señal de saber mui bien lo que se fai, nun dexar de sorprendete cola melodía. Y al llau, Rubén Bada. Como meyor espreso lo que fai ye diciendo que ye una d’eses persones que cuando-yos veo tocar digo: “Esto sí ye ser un profesional na música”. Col vigulín, cola guitarra, con estilu propiu, con muncha esperiencia, con saber facer (¡por saber, sabe hasta facer la guitarra, porque la que llevaba fízola él!).

«Mapi canta con una fuercia y con una elegancia tala que quedes a puntu de respigate. Un turullu vocal metíu en mediu d’una improvisación, un xugar coles dinámiques, nun dexar de sorprendete cola melodía»

Quédame Marcos, que nun lu tenía ficháu, pero dame a min que cuando la xente fala d’él debe dicir eso de “esti ye un finu”, qu’anque pueda nun paecelo, nel mundillu ye un piropazu top. Facer que too encaxe y empaste con un baxu o daqué asemeyao ye más común de ver. Cuando sientes a  dalguién algamalo con una batería, ye pa quitase’l sombreru. Y ¿qué estilu tocaron? Pues… nun sé encuadralo. Nun paga la pena, creo yo. Hai un estilu y un llinguax propiu dientro de caún, y tienen l’habilidá necesaria pa mezclalo y crear sinerxes.

«Nun paga la pena encuadrar l’estilu que tocaron. Hai un estilu y un llinguax propiu dientro de caún y tienen l’habilidá necesaria pa mezclalo y crear sinerxes»

Y ente tanto, con too esto furrulando, Mapi fálanos de la ropa que lleva puesta, porque sí, tamién pensaron neso. Ye una creación d’Isabel Hargoues, que tamién fizo’l vestuariu de La Maramoniz, y lo que consiguió nesti casu foi… Bono, ¿imaxíneste tresformar el monu de trabayar o la chaqueta azul de mahón en daqué tan guapo y elegante que pueda tar nel meyor de los museos de la confección? Mirái les fotos. Eso sí que ye dar la vuelta a un conceptu. Amás, ta fecho cola mesma tela que s’usa pa facer la camisa María Luisa. Rubén cuéntanos que lleva’l traxe de Milio “Tiadoro”, el padre de Leti Baselgas, que trabayó n’Ensidesa y llevaba muestres precisamente a los llaboratorios de Mieres. Y Marcos topó un monu de trabayar nun mercáu en Francia y decidió traelu pequí. Nun se sabe a quién perteneció, pero fizo que tamién tuviera representada tola xente que tuvo qu’emigrar, buscando trabayu o escapando por idees polítiques. Incluso pue que lu usara un emigrante, nun ye una llocura.

Tamién desplica Mapi que’l conceptu de Working Class, del que parte esti proyectu, tuvo muncha rellación cola marca Puru Remangu. Y ye que, a raíz de la coleición Asturies Working Class, empezó a da-y vueltes al arguyu que siente de pertenecer a la clase trabayadora, de venir de xente trabayadora, y de tener podío formase gracies a que se lluchó por qu’hubiere beques pa les families de la minería. Y, por supuestu, de poder espresase nuna llingua que, non solo-y representa (por eso había que traducir los cantares), sinón que ye, amás, la suya propia.

Quédame fixame nel públicu. Mapi pidiera dos coses. Una, que la xente fuera con ropa de trabayar; propia o de la familia. Y, per otra parte, que llevaren instrumental pa meter ruíu. Miro un bancu que tengo cerca y veo espátules de cocina y tapes de potes y sartenes. Nos momentos nos que Mapi s’emocionaba (porque siente de verdá lo que diz y lo que fai), gritaba «¡¡Crisis!!», y tol públicu-y daba tira colos cacharros y los sos gritos d’ánimu. Vuelvo a fixame na ropa. Equí y ellí vense camises María Luisa, monos… La xente fizo casu y llevólo con ilusión. Pero, jolín, entre toes eses prendes, una llámame l’atención. Llévala una moza que ta sentada delantre mío, tienla puesta per enriba, ensin meter los brazos. Ye una chaqueta azul escuru, con tires reflectantes y la hombrera naranxa. Un parche desgastáu paez adivinar el logu d’Hunosa. Como la tengo cerca, alcanzo a ver que ye una chaqueta usada, porque la parte naranxa ta manchada. Mírola dacuando y, pensando nella, viénenme flashes d’hestories que me cuntaron. De xente trabayando nes galeríes, de xente baxando nuna xaula de metal, de mios güelos… Ye un oxetu qu’espeya miles d’hestories de mineros, de families… tola hestoria de la minería n’Asturies. Mirala ye como ver too eso comprimío nun trozu tela con una mancha. Dando-y vueltes, enantes d’escribir la crónica, doime cuenta de que ye una mancha que yá conozo. Sí, ye verdá. Ye la mesma mancha de la hestoria que me cuenta siempre mio ma. Ye la mancha que-y quedaba a mio güelu nos güeyos dempués de duchase. Ye una mancha que nun se quita. Por más que la llaves, ye una marca. Asina ye la chaqueta de papá. Esa chaqueta usada, que tien hestoria tres d’una mancha, pal que sabe qué mancha ye.

«Ente toles prendes, una llámame l’atención. Ye una chaqueta col logu d’Hunosa. Pensando nella viénenme flashes d’hestories que me cuntaron. De xente trabayando nes galeríes, baxando nuna xaula de metal, de mios güelos… Ye un oxetu qu’espeya tola hestoria de la minería n’Asturies»

Acaba’l conciertu, faigo un par de fotos más y marcho ensin prisa pero ensin pausa pa L’Infiestu, que nunca ye tarde si l’armamos buena (o dalgo asina). Voi pensando que me resulta una dicotomía, una contradicción. Sí, sentimos arguyu, pero… ¿Cómo ye que nos sentimos arguyosos de dalgo de lo que les nueses families pasaron tola vida intentando salir? ¿Cómo ye qu’esti branu fui colos mios pas a Bélxica y dionos por buscar y averanos a la mina onde trabayó mio güelu ellí? ¿Qué fuimos a buscar? Y ¿cómo ye que sentimos arguyu de… de qué? ¿De miseries, de tar reventaos, de precariedá? ¿Arguyu de ser probes? Igual nosotros yá nun vivimos esa mesma realidá, pero ye gracies a tolo que trabayaron nuesos güelos pa que los fíos pudiesen estudiar, o polo menos tener un trabayu meyor. Tenemos arguyu de ser o de venir de la working class, pero… ¡Si lo que queremos ye salir d’ella! Yá lo dixo Mapi al entamu, “nun vamos a romantizar ser de la working class”. Entós, ¿de qué sentimos, de qué siento arguyu?

Fino la crónica respondiendo a la entruga que me barrenaba la cabeza dende qu’entamé a escribila: ¿D’ónde vien esi arguyu? Enantes de salir del edificiu, cuando tovía nun tenía contestao esta pregunta, dime cuenta de que me faltaba una foto; quiciabes yá encontrara la rempuesta, anque nin lo supiese: subo al escenariu y aprovecho que Mapi ta falando cola xente pa face-y una ´semeya a la espalda, onde’l vistíu pon: “Pueblu, tierra, trabayu”. Eso ye. Valores. Esos valores.

Gracies, Rubén, Marcos, y otra vuelta, gracies, Mapi.

PD: Si se grabó dalgo, pido, por favor, en nome de tolos que taben ellí, que se publique; si hai que facer un crowdfunding, facémoslo, que lo de dar tira ta visto que se nos da bien. Y si ayudaren dende ayuntamientos o’l propiu Gobiernu del Principáu a siguir moviendo esti conciertu per más sitios, pa que pueda conocelu más xente, sería redondo. Eso sí, que busquen un sitiu grande, porque va dir xente, yá aviso.