Balbino Menéndez y Ricardo Soberado estudien el floréu nuna nueva publicación

Ayeri, xueves 2 de xineru, el salón d’actos del edificiu del RIDEA, enllenu xente, esperaba a les 19h a qu’entamara la presentación d’una nueva obra d’investigación mui esperada: El floréu de gaita asturiana. Patrimonio, recuperación y uso de Balbino Menéndez Suárez y Ricardo Soberado Hoyos. Ramón Rodríguez Álvarez, director del RIDEA, dio pasu a los coautores del llibru, docentes dambos na Escuela de Música Tradicional «Manolo Quirós» d’Uviéu dende la década de los 90. Esta ye la segunda publicación conxunta qu’asoleyen dempués del manual didácticu Iniciación a la gaita asturiana (2011).

Dempués de la breve introducción de Ramón Rodríguez, na que, ente otros datos, descubrió’l tiempu de trabayu detrás de la investigación y escritura d’esti llibru -los últimos 5 o 6 años-, un móvil aparentemente inoportunu dexó sonar mientres unos segundos l’entamu del ‘Floréu de Remis’ interpretáu por Jose Manuel Tejedor «na pista 12 del discu Llunáticos de 2003 del grupu Tejedor», como apuntó Balbino. Esa melodía foi la escusa perfeuta pa desplicar la necesidá de facer un trabayu d’estes característiques sobre’l floréu de gaita asturiana, una de les manifestaciones idiomátiques del instrumentu más propies y identitaries del patrimoniu musical asturianu qu’hasta esti momentu nun tenía referencies escrites abondes pa la so conocencia fonda; muncho menos monografíes feches con talu rigor científicu.

Los autores desplicaron la importancia elemental del floréu pa los intérpretes de gaita asturiana. Escuende, según les sos pallabres, «matices técnicos, retóricos, musicales y estilísticos», un exemplu tresversal de les facetes del oficiu de la gaita dende la iniciación nel instrumentu, porque «cualquier aprendiz suaña con florear», como recordaba Soberado. El llibru ta estructuráu en tres partes: los testos musicales, l’estudiu y investigación, y la documentación. El pegoyu fundamental del trabayu foi la recopilación de centenares d’exemplos de floreos en delles fontes sonores, cola documentación que requier el procesu pa especificar los datos biográficos y discográficos asociaos a eses grabaciones. Tres una esbilla fecha a partir de dellos criterios, como l’añu de nacencia de los intérpretes -hasta 1950 con escepción de dos gaiteros- y la orixinalidá de les melodíes, la publicación inclúi les trescripciones de 239 floreos -malpenes una quinta parte de los que sintieron- de 67 gaiteros estremaos -cuatro d’ellos anónimos-.

Ún de los valores más evidentes d’esta investigación de Balbino Menéndez y Ricardo Soberado ye, precisamente, esi procesu de trescripción y análisis de los exemplos melódicos escoyíos, nel que toparon dificultaes d’escucha -pol estáu d’antigüedá, calidá y mala conservación de los audios- y de notación, porque «les necesidaes desbordaben los recursos». Nel envís de facilitar la interpretación y ser rigurosos, decidieron, tocante al tema de la notación, emplegar y desendolcar grafíes orixinales qu’atroparen tolos adornos que sentíen nes grabaciones. Dambos vivenciaron, amás, anéudotes que compartieron ayeri colos presentes, como los glayíos de los cantadores de tonada que toparon nes grabaciones y que torgaben la comprensión del soníu de la gaita, o los pitíos que Soberado soportó nes époques de mayor concentración de xera. Un trabayu, a la fin, d’un valor bultable y incalculable.

Per otru llau, tal como lo cuntaron los autores, la parte del estudiu teóricu inclúi esi análisis de les grabaciones y trescripciones -con conclusiones sobre l’ámbitu melódicu, la tonalidá, el material temáticu, la métrica, l’agóxica y l’estilu de los floreos, ente otros elementos-; una definición y hipótesis sobre l’orixe, desarrollu y afirmación del fechu musical del floréu na gaita asturiana -y una teoría tamién sobre’l propiu términu-; y un trazáu de les perspectives futures nel tema. Nesti procesu, les torgues aportaron pola falta de documentación escrita sobre la cuestión y una «situación deficitaria na música notada», en pallabres de Balbino.

La presentación finó dempués de más d’una hora cola esposición de los resultaos oxetivos y prospectivos, anéudotes sobre’l misteriu de la gaita qu’acompañaba a La Busdonga nes sos grabaciones o’l gaiteru que protagoniza la portada del llibru -por poner dos exemplos-, delles entrugues del públicu, y los agradecimientos de Balbino Menéndez y Ricardo Soberado pa la xente que-yos apurrió materiales y apoyu nestos últimos cuasique 6 años de trabayu, discusión «por rigor y por vocación» y dedicación a El floréu de gaita asturiana.