Algaire algama’l XIV Premiu Camaretá con “Coral y Maera”

Coral y Maera ye la canción ganadora nesti XIV Premiu Camaretá al meyor cantar en llingua asturiana. Algaire algamó esti gallardón nuna votación axustada -como sorrayó Antón García, Director Xeneral de Política Llingüística, a la entrega del premiu-, que-yos fizo quedar per delantre de los otros dos temes finalistes: “Como’l mar” de Dixebra y “Fíu d’un pueblu” de Mostru l’Horru. A la entrega del troféu, el grupu agradeció a tola xente que sofita’l so proyectu, a la música asturiana en xeneral y, sobre manera, a Luis Ángel Fernández Santos, compositor del cantar premiáu.

Un tríu de cuerda acompañó a Algaire na interpretación de “Coral y Maera”

La banda formada por Iratxe Espina, Carla Miranda, Loreto Suárez y Juan Yagüe foi la primera en xubir al escenariu del Teatru de La Llaboral nun formatu únicu. Ensin panderetes, con Yagüe al pedal steel en cuenta de a la guitarra y arrodiaes de seis músicos y d’una pareya de baille que yá collaboraron con elles notres ocasiones; la formación mierense interpretó “Coral y Maera”, un cantar con ritmu de xota, llevándolu a un soníu más pop y melódicu. Al igual que yá ficieran nel Festival Intercélticu de Lorient -onde ganaron el Trophée Loïc Raison pasando per delantre d’otres 14 formaciones-, la so cuidada puesta n’escena, ampliar la instrumentación y da-y protagonismu al baille, reforzó la propuesta d’esta banda.

Pandereta y rock n’asturianu per primer vez xuntes nun escenariu

Tamién foi novedosa l’actuación de Dixebra. Lluci G. Palomares (Corquiéu) y Bárbara González-Quevedo (Alienda) xubieron al escenariu cola veterana formación pa poner voz y pandereta a “Como’l mar“, como yá ficieran nel discu Ente la niebla. Esta collaboración supunxo la primer vez qu’unes pandereteres tocaben xunto a una banda de rock astur y la fuercia que tresmite palpóse nun Teatru de La Llaboral que vibró colos diez músicos qu’interpretaron esti cantar dedicáu a la emigración asturiana.

Mostru l’Horru escoyeron el formatu más cenciellu pa interpretar “Fíu d’un pueblu”

L’últimu turnu llegó pa la formación más nueva de les tres, Mostru l’Horru, dúu de rap qu’apocayá asoleyó’l so primer trabayu Señales de Fumu. El dúu formáu pol cantante Francisco Méndez y el productor Zeros interpretó “Fíu d’un pueblu“, un cantar a ritmu de rap y reggae, con una lletra crítica cola situación asturiana y na que destaca’l bayurosu léxicu emplegáu. Con namás un DJ y un MC, los dos componentes aportaron frescura y dinamismu a la so actuación, llevantando les palmes del públicu presente na Llaboral.

Fernández Santos recoyendo’l premiu xunto a les componentes d’Algaire

Mientres l’actuación de Tras el Muro, formación ganadora del Premiu Camaretá l’añu pasáu, el xuráu aldericó y puntuó cadún de los tres cantares. A la fin, “Coral y Maera” foi’l vencedor, amosando la perbona respuesta qu’Algaire tán teniendo per parte de la crítica y del públicu dende qu’asoleyaron el so primer discu hai ocho meses. La formación xunto al baillaor y compositor Luis Ángel Fernández Santos recoyeron el premiu y volvieron a interpretar el cantar premiáu nuna gala qu’amosó la diversidá de la música asturiana -sonó folk, pop, rock, rap y reggae-, y el futuru de la escena: axuntó a formaciones que lleven 35 años tocando con otres nes que tolos sos componentes son menores de 35 años.

Semeyes de Glendor Díaz, por cortesía d’A Mansalva Producciones.

1 Comment

  • Olaya
    23/10/2022

    No mrabona a les ganaores y a los otros finalistas.
    Qué prestosa la puesta en escena de Tras el muro.
    El soníu de la gala na tele nun tuvo tan bien como nel teatru.

Dexa un comentariu

X