Mediu sieglu nun pue resumise nun par d’hores. Cinco décades de música son, polo menos, trés xeneraciones d’asturianos al mesmu son, cincuenta años cantando nuna llingua que nun esiste, cincuenta d’utopía y otros tantos de compromisu cola tradición musical asturiana. Por suerte pa los qu’ellí tuvimos, «¡Equí va la despedida?» nun foi un resume, sinón un cachín más d’esta hestoria, fecha regalu p’aquellos que mos agarramos al signu d’interrogación tres la pallabra «despedida».
Chus Pedro y Manolo apaecieron n’escena ente los aplausos d’un auditoriu a rebosar, mientres la OSPA yá facía la presentación de la fola de grandiosidá instrumental que taba a piques de nos somorguiar.
«Chus Pedro y Manolo apaecieron n’escena ente los aplausos d’un auditoriu a rebosar, mientres la OSPA yá facía la presentación de la fola de grandiosidá instrumental que taba a piques de nos somorguiar»
«So vaqueiru» foi la puerta d’entrada a esta propuesta sinfónica, un tema que mos punxo aína de frente al supuestu «decoru» inconsciente que mos percuerre cuando nos asitiamos delantre d’una orquesta y nun auditoriu. Sicasí, namás ficieron falta un par de temes más pa colgar nel auditoriu el cartelu de «nesti chigre pue cantase» y yá nun hubo quien mos baxara más d’aquel «dos caballos». Entamó asina un viaxe nel qu’entonamos «El chamiceru» y «El veleta» y esfrutamos de la sutileza cola que Peñayos dialogaba con contrabaxos y trompes sobre la melodía de «El galán d’esta villa».
«Chus Pedro, cayáu en mano, aprovechó pa recordanos que, entá con dalguna arruga más qu’en xunetu del 78, siguen siendo unos adolescentes qu’apuesten pola utopía»
Chus Pedro, cayáu en mano, aprovechó pa recordanos que, entá con dalguna arruga más qu’en xunetu del 78, siguen siendo unos adolescentes qu’apuesten pola utopía. Una utopía de llibertá y sofitu mutuu, de la que formaron parte figures como Juan Muñiz Zapico, al que, xunto con tola comunidá minera, ufiertaron una impactante versión de «Nel Pozu María Luisa».
Otres utopíes de les que tamién formaron parte los Nuberu, les de la llibertá sexual y los paseos per Torimbia, fueron les qu’inspiraron «Liberar l’amor», ún de los temes que más fixo resquebrayar y estremecer la voz del cantante.
Tristemente, la tamién cada vez más averada a la utopía, sanidá pública y gratuita, y en concreto los cuidaos del Centru de Salú de L’Entregu y de la Unidá Cardiovascular de Cabueñes, llevaron l’agradecimientu de Chus Pedro y el fuerte aplausu de tol públicu, xusto enantes del primer «Chalaneru».
«Decía Dolfu Camilo, nel Anuariu de 2016, que Manuel Asur ficiera pa los pletóricos Nuberu dellos de los meyores momentos de la historia de la música del nuestru país. Diez años dempués, puedo dicir que la OSPA-y devolvió de dalguna manera esi favor»
Si «Dar tira» güei n’Asturies suena más a movimientu feminista qu’a turullu, ye porque entá tamos necesitando d’estos aliendos de solidaridá. Decía Dolfu Camilo, nel Anuariu de la Música Asturiana de 2016, que Manuel Asur ficiera pa los pletóricos Nuberu dellos de los meyores momentos de la historia de la música del nuestru país. Diez años dempués, puedo dicir que la OSPA-y devolvió de dalguna manera esi favor. La batuta de Rubén Díez y unes cuerdes especialmente robustes llevaron al yá imponente «Dame tira» a la so máxima espresión.
Na recta final del conciertu, la gaita de Pedro Pangua entrellazó’l so soníu col de los oboes de la OSPA nuna versión de «Céltica» al más puru estilu Keltikhé; resonancies épiques que repitieron más tarde nel yá himnu «Aida de la Fuente».
Con llárimes nos güeyos, pero cola mesma fuercia que fai cinco décades, sonaron los bises de «El veleta» y «Chalaneru», pa enllenar el teatru d’emoción y desatar una ovación atronadora que paeció nun tener fin.
«¡Equí va la despedida?» foi una nueche que vieno a demostranos por qué estes canciones siguen formando parte de la memoria colectiva, vieno a decinos por qué Nuberu ye la voz de l’Asturies del trabayu, la que nun escaez, d’una Asturies qu’atiendi, la que tamién sabe qu’una patria namás de xestos —de montera, sidra y Cuadonga— ye irrelevante ensin toes les sos lluches»
«¡Equí va la despedida?» foi una nueche que vieno a demostranos por qué estes canciones siguen formando parte de la memoria colectiva, vieno a decinos por qué Nuberu ye la voz de l’Asturies del trabayu, la que nun escaez; d’una Asturies qu’atiendi, la que tamién sabe qu’una patria namás de xestos —de montera, sidra y Cuadonga— ye irrelevante ensin toes les sos lluches.
Nuberu, que nun mos falte la to voz.
Suscríbite a les nuestres novedaes
