Depués de qu’entraren nel estudiu de grabación a finales d’ochobre, yá aportó de los Estudios Tutu de Los Campos (Corvera) el máster del próximu y esperáu trabayu discográficu de Dixebra. Esta selmana qu’entra la banda avilesina va unviar a fábrica’l CD y va poder anunciar la fecha oficial de llanzamientu, asina como activar la preventa del llibru-CD xunto a merchandising na tienda online del grupu dientro de musicasturiana.com
‘Ente la niebla’, va ser la obra más ambiciosa y personal de Dixebra, un trabayu conceptual alredor de la historia, la llucha y la significación del movimientu obreru y les clases populares asturianes. Nesti llibru-CD ¡collaboren periodistes, escritores, profesores, historiadores, ilustradores, dibuxantes… que, coles sos creaciones, reflexonen sobre’l pasáu, el presente y el futuru de la clas obrera asturiana. Según la banda: «la evolución histórica de les clases populares y trabayadores d’esti país son parte fundamental de la nuestra idiosincrasia como pueblu y una seña d’identidá con una potencia como poques». Con esti filu conductor preséntase un conxuntu de venti cantares -ordenaos cronolóxicamente- que traten de la llucha obrera, la resistencia antifascista, la represión franquista, l’exiliu, los fugaos, la emigración o les movilizaciones populares.
Pa contestualizar y entender meyor qué significaron toes estes cuestiones cuéntase coles aportaciones de Rubén Vega, Pablo Texón, Marta Mori, Rafa R. Valdés, Irene Faza, Faustino Zapico, Miguel Solís, Penélope Miranda o Alfonso Zapico, ente otros. Amás, el llibru va abrise con un testu de Primi Abella (guitarrista) onde fala de cómo foi’l procesu de creación de los cantares y de les temátiques concretes de caún, y va zarrase con otru de Xune Elipe (cantante) sobre la rellación de la música y les lluches de les clases populares asturianes a lo llargo de la historia.
Nel terrén musical, el discu ta formáu por venti cantares nos que van dexase sentir composiciones d’aire distintu ente sí: rock, reggae, ska, folk, funk, metal… nuna bayura de soníos que sigue la filosofía musical dixebriega.
Suscríbite a les nuestres novedaes
