«Moriyón n’Arxentina llogró profesionalizar l’oficiu de gaiteru tradicional como lu conocía n’Asturies»

La Banda Gaites LaKadarma en collaboración cola parroquia rural de Villamayor entama’l martes 4 d’abril, a les 19.30h, nel ábside de Villamayor (Piloña), la conferencia La gaita criolla al traviés d’Emilio Rodríguez Moriyón. Reflexón so l’actividá musical y la gaita dende una perspectiva llatinoamericana. Nesta conferencia el conceutu de gaita criolla axunta lo asturiano, lo gallego y lo arxentino al traviés de la música y de la figura d’esti gaiteru popularmente conocíu como “El gaitero de Gijón”. Nacíu en 1903 en Xixón, con 17 años emigró a Arxentina, onde’l desarrollu de la so carrera como gaiteru profesional tuvo de resultáu un heriedu bayurosu. La so gaita, fabricada en Bonos Aires, foi la ferramienta que-y permitió interpretar el repertoriu reflexáu nos sos manuscritos y nos discos grabaos xunto al so propiu conxuntu musical. A partir del análisis organolóxicu y musical d’estos elementos podemos entender la idea de que la gaita criolla foi, pa Emilio Rodríguez Moriyón, un instrumentu suxetu a estremaos procesos de «tresculturación» (Ortiz 1940), convirtiéndose asina nuna ferramienta a medida pal desendolcu del so oficiu como músicu profesional n’Arxentina.

La conferencia impártela María Josefina Moragues, estudiante de la Llicenciatura en música con orientación en Flauta nel Institutu Superior de Música de la Universidá Nacional del Llitoral, estudiu que compaxina cola so actividá como gaitera y flautista en distintes agrupaciones de la ciudá de Santa Fe, Arxentina, onde reside. La so llínia d’investigación ta dedicada al estudiu de la gaita dende una perspectiva postcolonial y llatinoamericana. Como parte d’estos trabayos, foi beneficiaria dientro del programa de Beques d’Iniciación a la Investigación pa Estudiantes de Carreres de Grau nomáu Cientibecas pola Universidá Nacional del Llitoral. Falamos con ella p’afondar en too esto.

Josefina, perteneces a una xeneración de gaiteres y gaiteros formaos musicalmente nes Comunidaes Asturianes nel esterior. ¿Cómo fueron los tos entamos nel mundu de la música? 

Bono, los mios entamos fueron poco convencionales n’Arxentina, yá que’l primer instrumentu que quixi deprender a tocar foi la gaita asturiana. Yera pequeña y tuve qu’esperar dende los ocho hasta los diez años pa poder facela sonar, asina que tenía que conformame cola típica flauta de práutica. Dende entós, amás, fui probando otros instrumentos tradicionales, como la pandereta o’l tambor. Bien llueu, a los 11 años dempués d’escuchar munches veces a grupos como Felpeyu, el  mio interés foi pola flauta travesera. D’esta manera entamé na escuela de música y sigo na universidad estudiando esti instrumentu. 

¿Con qué dificultaes s’atopa una persona p’aprender a tocar la gaita asturiana n’Arxentina?

Creo qu’una de les dificultaes más bultables ye l’accesu al instrumentu o al so mantenimientu. Por exemplu, si bien, anguaño, tán construyéndose payueles o payones n’Arxentina, la distancia con Asturies nun facilita l’accesu a estos materiales o a la información que se requier pa manipulalos. De toes maneres, ye importante sorrayar nesti casu’l gran trabayu que desendolquen los centros asturianos no que cinca al espardimientu y enseñanza de la cultura asturiana, dalgunos con más o menos recursos, pero siempre intentando perpasar estes dificultaes.

¿Quién foi Emilio Rodríguez Moriyón? ¿Qué importancia tien la so figura pal mundu de la gaita asturiana?

Emilio Rodríguez Moriyón foi un gaiteru nacíu en Xixón nel añu 1903 qu’a los 17 años emigra a Bonos Aires. Ellí desarrolló la so carrera musical hasta la década de los sesenta, cuando retorna a Asturies. Per otru llau, el fechu d’aniciar los sos estudios musicales y de deprender a tocar otru tipu de gaita foi lo que-y permitió emprender la so carrera de manera profesional, non sólo conformando’l so propiu grupu musical llamáu “El gaitero de Gijón y su conjunto” sino tamién escribiendo arreglos de músiques populares y tradicionales pa elli mesmu, y amás, grabando discos. Entós, en rellación a la segunda entruga, Moriyón n’Arxentina llogró profesionalizar l’oficiu de gaiteru tradicional como lu conocía n’Asturies. La so importancia radica nel llegáu que nos dexó, gracies a ello. Si bien, el so repertoriu taba formáu por estremaos tipos de música, la’asturianía yera la so identidá y marca personal.

«Ye importante sorrayar el gran trabayu que desendolquen los centros asturianos no que cinca al espardimientu y enseñanza de la cultura asturiana»

¿Cuáles son les razones poles que decidiste entamar a investigar la figura d’Emilio Rodríguez Moriyón?

Una de les principales razones foi l’interés por entender el desconocimientu que tenía de la so carrera, siendo esta, amás, desendolcada n’Arxentina. Nun entamu, lo que más m’atrayía estudiar yera’l tipu de gaita que tocaba y por qué. Conforme la investigación foi avanzando, decateme que yera mucho más que’l instrumentu en sí. Foi un gaiteru con gustu y criteriu musical, y el so llegáu, que tanto menciono, foi daqué que descubrimos día a día, amás de los archivos que taben recopilaos y guardaos. Per otra parte, n’Arxentina tuvo en contautu cola colectividá gallega principalmente y foron ellos los que-y prestaron una gaita pa entamar a practicar. Eso lu convierte nuna figura que nun ye nin una cosa nin la otra, ye asturianu pero ta colos gallegos, toca una gaita fabricada n’Arxentina… estos aspeutos resultáronme llamaderos dende l’entamu.

Desplícanos un pocu más, ¿a qué se fae referencia cuando se fala de “la gaita criolla”? 

“Gaita criolla” foi un términu que lleí nel llibru/discu Al Son del Indiano de José Ángel Hevia. Al traviés de diferentes charres con elli, llegamos a la conclusión de que cuando falamos de gaita criolla, non sólo nos referimos a la forma en que se desarrolló’l mundu de la gaita nel otru llau del Atlánticu como actividá musical, sinon que tamién, baxo esti conceutu, podríamos estudiar los tipos de gaites que fueron construyíos, como nel casu de la de Moriyón, n’Arxentina.

«El conceutu de “gaita criolla”, permite estudiar en profundidá lo qu’asocedió y socede al respeutu de la gaita en Llatinoamérica y non sólo dende’l típicu relatu indianu d’ida y vuelta, sinon tamién dende una posición reivindicativa»

¿Qué conflictos plantega esti conceptu dende una visión purista de la música tradicional?

Dende yá, ye una entruga difícil de responder. La pallabra “purista” yá nos posiciona nun sitiu onde sabemos que nun s’almiten otros aspectos que nun seyan los esenciales, si ye qu’eso esiste daveres. Tamién debemos entender qu’eses visiones puristes son, a la fin, convenciones baxaes dende arriba por axentes de poder. En contraposición a “lo purista” surde’l conceutu de “gaita criolla”, yá que, nos permite estudiar en profundidá lo qu’asocedió y socede al respeutu de la gaita en Llatinoamérica y non sólo dende’l típicu relatu indianu d’ida y vuelta, sinon tamién dende una posición reivindicativa.

¿Qué fontes documentales emplegaste nel procesu de recoyida d’información pa esti trabayu?

Les fontes foron varies. Lo primero, tolos documentos y el material que perteneció a Moriyón: la so gaita, les partitures manuscrites, semeyes d’aquella dómina, los sos discos y recortes de noticies. Tamién foron fundamentales les entrevistes feches a José Ángel Hevia (ya qu’él conoció en primera persona a Moriyón) y a Daniel Pazos, profesor de gaita gallega en Bonos Aires y que nos contextualizó sobre los constructores de gaita que exercíen d’aquella. 

«Toi investigando sobre la tresculturación, l’alcuentru ente la gaita y el tangu, exemplificando y tomando nuevamente los manuscritos de Moriyón»

¿Qué otres persones andecharon contigo nesta investigación?

Foron munches les persones que collaboraron pa la realización d’esta investigación. Ente elles, Balbino Menéndez Suárez, que foi’l tutor d’esti trabayu y siguió tol procesu d’investigación. Per otru llau, José Ángel Hevia non sólo nos informó sobre distintos aspectos de la carrera de Moriyón, sinon qu’amás brindónos la gaita que perteneció al Gaitero de Gijón y qu’elli conserva anguaño. Gracies a ello pudimos acceder a Alberto Fernández Varillas, quien collaboró nel analís organolóxicu de la gaita. Tamién ye importante sorrayar l’ayuda de Luis Estrada, quien nos facilitó los documentos pertenecientes a Moriyón que comenté enantes.

Fálanos de los tos próximos proyectos profesionales.

D’un llau, la investigación dientro del conceutu de “gaita criolla” y la figura d’Emilio Rodríguez Moriyón, continúa. Sigo na búsqueda y na reconstrucción del so llegáu. D’otra parte, entamé un nuevu trabayu d’investigación onde la idea ye analizar, al traviés d’estremaos conceutos como por exemplu’l de tresculturación, l’alcuentru ente la gaita y el tangu, exemplificando y tomando nuevamente los manuscritos de Moriyón. Per otru llau, en paralelu, sigo cola mio carrera de flautista y gaitera.

«Ye necesario llevar la música asturiana a otros ámbitos que valoren la so presencia dende lo natural y lo popular. Eso algámase gracies a la convivencia que permite’l celtismu»

¿Cuál ye, na to visión, l’estáu de salú de la música tradicional asturiana en Llatinoamérica y n’Arxentina en particular?

Considero qu’en Llatinoamérica el panorama tórnase complicáu a veces, ya que trátase de dalgo un pocu desconocíu pola mayoría de la xente y esi públicu hai que se lu ganar, falando siempres de puertes pa fuera de lo que son los centros asturianos, claro.

N’Arxentina, particularmente, l’asturianía vívese d’una manera distinta que n’Asturies o dientro d’España. Hai una pasión mui grande que nos fai llevar a Asturies a tolos llaos que vayamos, yá seyan proyectos musicales, clases, etc. Pasa tamién que la música tradicional asturiana n’Arxentina ta enmarcada y agospiada dientro del celtismu. Delles veces ésto nun ye favorable, ya qu’ún quier sentise identificáu como asturianu, pero per otru llau, considérolo necesario. Creo qu’eso ye lo que permite la permanencia, anguaño y nun futuru, tanto de la música asturiana como d’otros folclores, por exemplu, de la música gallega, inglesa o irlandesa. De lo contrariu, solo nos espresaríamos nel ámbitu del centru asturianu, el cual tien sobre too un espíritu de conservación y tradición. Pero, insisto en que ye necesario trascender esa esfera y llevar la música asturiana a otros ámbitos que valoren la so presencia dende lo natural y lo popular. Eso algámase gracies a la convivencia que permite’l celtismu.