Pandereteros d’Anguaño da’l so primer conciertu esti domingu na Taberna Narciso de Teberga

Esti domingu 2 d’abril a les 13h preséntase en directo un nuevu proyectu musical, Pandereteros d’Anguaño. La Taberna Narciso de Teberga va acoyer l’actuación d’esti tríu formáu por veteranos de la música tradicional, Satur Vega al curdión, bouzuqui y voz; Xesús Nel Villanueva al clarinete percusiones y voz y Luis Ángel Fdz. Santos a les panderetes y voz.

«Trátase d’ún grupu que ñaz col envís de facer música d’anguaño pa baillar como enantes, nun intentu de poder siguir faciendo música asturiana pal baille a lo suelto, como si nunca hubiere una brecha ente lo que güei conocemos como la música tradicional y la música folk», desplica Luis Ángel Fdz. Santos sobre esta formación que nació en 2022 «dempués d’ún primer intentu fallíu nel 2018, onde poco más que llegamos a dar un conciertu dientro’l festival Sol Celta d’Avilés».

Nel so repertoriu vamos poder atopar xotes, muñeires, llixeres, pasodobles, sones d’arriba o polkes, toes elles de creación propia y con lletres que rezumen «un ciertu tonu críticu y desenfadáu», como sorraya Fdez. Santos. Amás, toles pieces son «100% baillables y abarquen un bona parte de la xeografía asturiana en cuanto a estilos pal baille». D’esta manera Pandereteros d’Anguaño enanchen el llistáu de grupos musicales actuales que tán surdiendo cola pandereta como instrumentu principal.