El próximu llunes ye’l 1 de mayu, el Día Internacional de la Clase Trabayadora. Coincidiendo con esta fecha, sindicatos y colectivos sociales entamen delles movilizaciones y otres actividaes alrodiu rellacionaes cola defensa de los derechos de les clases populares. La música asturiana nun ye daqué ayeno a esto y Xixón va acoyer dellos conciertos esti fin de selmana: La Tarrancha, Ochobre y Escuela de Odio toquen el sábadu 29 na Sala Albéniz y 6 Riales y el Coru Antifascista Al Altu La Lleva el domingu 30 en Cimavilla.
El movimientu de reciente creación Asturies Insumisa entama’l conciertu que pon fin a les xornaes Abril Insumisu. Nél van tocar esti sábadu la banda de mecigayu ska La Tarrancha. el grupu punk-folk Ochobre y la mítica formación hardcore Escuela de Odio, que tamién tien dellos temes n’asturianu dientro’l so repertoriu. La cita va ser a les 19h na Sala Albéniz y tien un preciu de seis euros la entrada anticipada y de ocho euros na puerta.
Per otru llau, el domingu 30 dende les 16h Cimavilla va acoyer la Folixa del 1u Mayu qu’esti añu va facese en sofitu a les 6 de La Suiza, trabayadores a les que-yos piden 3 años y mediu de cárcel por movilizase sindicalmente. Nesti eventu actúen el tríu de música tradicional 6 Riales y el Coru Antifascista Al Altu La Lleva, ente otres formaciones de fuera d’Asturies. Los bonos de sofitu tán a la venta por diez euros en dellos llocales de Xixón, La Felguera y Avilés.
Suscríbite a les nuestres novedaes
