Dempués d’asoleyar en febreru «Ni bajo el mar«, Ferla Megía regresa con «Ramu Verde«, nuevu cantar con videoclip. El músicu sierense presenta una revisión d’esti tema popular de la zona de Sanabria al qu’amesta «drill, trap, y movides asina urbanes». «Pensé que podía quedar guapo mete-y esi rollu, y ye llamativu lo bien qu’encaxa. Tamién uso sampleos vocales de Beny Jr y Morad, y faime gracia pensar que Morad tea presente nun cantar tradicional», comenta Ferla.
Amás del cantar, que yá tá disponible en toles plataformes dixitales, «Ramu Verde» aporta con videoclip: «Ayudáronme a grabalu mio moza y dos collacios y pasámoslo perbién. Fuimos probando planos nel monte frente a mio casa, llueu entamó a llover y tuvimos que marchar. Colo que nos dio tiempu monté’l videu y el resultáu ye un DIY mui interesante». D’esta manera Ferla Megía sigue avanzando nel so camín de facer «musica urbana pero que nun tea fecha nun entornu urbanu».
Suscríbite a les nuestres novedaes
