Corquiéu aportó n’acabando los 90 y namás ficieron falta trés discos pa consideralos una pieza fundamental del folk asturianu. Siguiendo’l formatu de grupos como Llan de Cubel y Felpeyu, una formación grande y col estilu de rasgueo ‘folkie’ de les cuerdes, pero desendolcando una sonoridá propia, bien ceo foi ún de los grupos que llevó la so música fuera d’Asturies, espardiéndola en xires europees. Corquiéu ye ‘folk cañón’, pero tamién son balaes que calaron na memoria del públicu, y que güei son himnos d’esos que puede cantar una carpa entera, como ‘La Viquina’.
Aquel grupu qu’entamó a surdir l’añu que Rigu Suárez dedicó toles selmanes a dir al Ayuntamientu de Ribeseya a preguntar cuándo diben poner un profesor de gaita, acabó, gracies a esa pasión de tolos miembros que pasaron pela formación, grabando trés discos: La Barquera (2000), Salia (2005), y Suaña (2010), xunto a El Zanjón, un EP de trés temes que sacaren l’añu pasáu (2025); una discografía d’eses enllenes de temes míticos.
Amás, en Corquiéu tuvieron y tán munchos músicos clave na escena, d’ente los que parezme qu’hai que destacar a Xurde Fernández pol trabayazu coles flautes nel segundu discu, al tristemente fináu David Mateos ‘Puru’, otru pilar pal bodhran n’asturies, y a una voz referente na historia de la música asturiana como ye Gema García.
Amás de la buelga discográfica que vienen dexando, Corquiéu ye ún de los grupos con meyor directu de la escena, lo que venimos esfrutando y verificando en cada conciertu que dan dende la so vuelta a finales de 2024. Mientres esperamos a la temporada de branu pa tornar a velos allegrando les nueches asturianes, dexámosvos esta playlist de temes básicos colos que podéis dir calentando hasta que podamos sentir el baxu pedal en directu.
Con esta publicación continuamos la estaya de playlists nel nuestru perfil de Spotify. Inspirándonos nes This Is: que la plataforma musical sueca dedica a artistes de renome, Musicasturiana.com facemos lo propio centrándonos nos cantares de los grupos más destacaos de la música’l país. Esto ye: Dixebra, Esto ye: Llan de Cubel, Esto ye: Mariluz Cristóbal Caunedo, Esto ye: Nuberu, Esto ye: Muyeres, Esto ye: Nacho Vegas, Esto ye: Felpeyu, Esto ye: L-R y Esto ye: Los Berrones foron les anteriores incorporaciones. La escoyeta musical d’estes playlists nun respuenden namás a criterios algorítmicos o a los temes más populares de cada formación.
Suscríbite a les nuestres novedaes
