Hai unes selmanes estrenábase en YouTube ‘L’alcordanza encesa’, el nuevu videoclip de La Tarrancha. El grupu mecigayu-ska regresó, dempués de dos años ensin asoleyar material nuevu, con esti emotivu tema que fai alcordanza a ritmu punk-ska de los seres queríos que yá nun tán ente nós y de persones que llucharon pol cambiu social. Agora’l cantar pue sentise en formatu audio en Spotify y nes demás plataformes musicales.
«La madre presente, el padre presente. Presente l’hermanu, la hermana, los güelos. Presente l’amigu, l’amiga, Presentes los echaos al monte. Les que nunca callaron. Presentes les que fendieron cadenes. Presente l’amor de la to vida. Presente la muerte, pero más presente la vida«, ye parte de la guapura de la lletra d’esti cantar que foi grabáu nos Tutu Estudios de Corvera baxo la producción de Sergio Rodríguez.
‘L’alcordanza encesa’ ye un alegatu a tener presentes a tolos seres queríos que yá nun tán ente nós; un glayíu a caltener viva la llama del recuerdu a güelpe de punk y ska; una pieza enllena d’emotividá, qu’homenaxea al pasáu cola mirada puesta nel presente y nel futuru.
El videoclip estrenáu’l pasáu 15 de mayu tuvo una perbona acoyida; precisamente, la obra audiovisual ye ún de los pegoyos d’esti cantar, que-y da tovía más xacíu y emotividá a la pieza. Nel videu salen difuminaes les imáxenes de seres queríos de La Tarrancha y de collacios y collacies de la banda que quixeron mandar les sos semeyes. Tamién salen artistes rellacionaos cola cultura y personaxes de la historia social recién qu’entá ensin tener una rellación directa col grupu, dexaron la so buelga nél y/o representen simbólicamente a muches figures con nome o anónimes que La Tarrancha quier tener presentes. Col llanzamientu nes demás plataformes musicales, ‘L’alcordanza encesa’ pue sentise en cualesquier formatu dende tolos países del mundu.
Suscríbite a les nuestres novedaes
