La Banda Sonora d’Ana Pereda

Ana Pereda lleva dende que tenía tres añinos xubiendo a escenarios. Ye compositora, cantante, toca la guitarra, l’acordión, el charango, el panderu y lo que-y pongan per delantre. En 2011 fundó n’Avilés xunto a Ánxela Gómez d’Ávila el dúu Filanda, col qu’asoleyaron hai diez años el discu Despeinando’l Silenciu. Dende va unos años ta emigrada en Lyon (Francia) onde la señaldá fixo que formara LaGuinda, un proyectu qu’entemez música asturiana, llatinoamericana y de la Isla de la Reunión y qu’esti branu tuvo xirando per Asturies.

Con ella siguimos la estaya «La Banda Sonora De…«, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y marcaron.

Semeya d’Andrés Castillo.

Sienti la playlist La Banda Sonora d’Ana Pereda

Un discu qu’enxamás canses de sentir.

Vrienden de Vrienden. Polo que tengo entendíu esti proyectu yá nun ta n’activo. Ye una pena porque tienen dos discazos increíbles.

Si tuvieres que formar parte d’otru proyectu musical, ¿cuál sería?

De grupos n’Asturies encantaríame tocar l’acordión con La Tarrancha o Fabes de Mayo, y cantar col grupu Muyeres.

De los cantares que compusisti o interpretes, ¿cuál ye’l to preferíu?

‘Alimoche’, un cantar homenaxe a tola xente que vive lloñe de la so tierra, una metáfora col maxestosu páxaru migrante que tenemos la suerte d’acoyer toles primaveres nes montañes asturianes. Acabamos de grabalu nel estudiu; será’l próximu single qu’asoleyemos con LaGuinda.

«Nel mio primer conciertu con Filanda taba tan nerviosa que lo primero que dixi foi que me llamaba Ánxela Gómez, el nome de la mio compañera de música y de vida, que taba al mio llau muerta de risa»

¿Cuándo foi la primer vez que xubisti a un escenariu y que pasó enantes, durante y dempués?

Tuvi la suerte d’entamar de mui piqueñina na música. Foi cola escuela de música La Cantoría qu’enantes taba nel barriu de Sabugo n’Avilés. Imaxínome que tendría 3 o 4 años nel mio primer conciertu, asina que nun m’alcuerdo de muncho. Namás que cada conciertu yera una fiesta porque venía tola familia a veme.

Sinón, una alcordanza más cercana ye’l mio primer conciertu con Filanda. Taba tan nerviosa que lo primero que dixi foi que me llamaba Ánxela Gómez, el nome de la mio compañera de música y de vida, que taba al mio llau muerta de risa.

¿Qué ye lo más inxusto de ser artista?

La precariedá llaboral.

Si fueres Conseyera de Cultura, ¿qué son les primeres coses que fadríes?

Crearía un Estatutu d’Intermitencia como lu hai en Francia. Una manera d’entender y acompañar la profesión. Les artistes trabayamos de manera intermitente, un poco al revés que los que tienen un trabayu más normativu. Nosotres trabayamos cuando los demás tán de fiesta, de vacaciones o de descansu. Sicasí, hai periodos como l’iviernu, por exemplu, onde hai menos festivales, menos eventos,…

En Francia cuasi la metá del presupuestu de cada conciertu declaráu, va pa les cotizaciones sociales. Esto permite que los artistes reciban un salariu dignu durante tol añu. Incluso nos meses onde nun hai conciertos. Si faes 43 conciertos al añu o un total de 507 hores, puedes acceder a esti estatutu. Les artistes, cuando nun tenemos conciertos, nun paramos de trabayar: seguimos trabayando la técnica del instrumentu, ensayamos colos grupos, creamos nueves obres, montamos nuevos proyectos, trabayamos p’alcontrar nueves feches de conciertos, grabamos nel estudiu…

Ensin un sistema qu’entienda y sofite la profesión, les y los músicos tán condergaos a la precariedá. Un pueblu en sin arte ye un pueblu sin vida. Ye un derechu. Si fuera conseyera de Cultura llucharía por ameyorar les condiciones llaborales de les artistes.

«En Francia cuasi la metá del presupuestu de cada conciertu declaráu, va pa les cotizaciones sociales. Esto permite que los artistes reciban un salariu dignu durante tol añu. Incluso nos meses onde nun hai conciertos»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

La mi mayor inspiración pa componer n’asturianu foi la mio compañera de vida Ánxela Gómez d’Ávila. Ella ye una gran poeta, compositora y cantante. Con ella y colos sos cantares n’asturianu, decatéme del potencial d’utilizar la nuestra llingua na música. Amás d’usala como una ferramienta política pa facela vivir y nun dexar que muerra, en mí tamién activa dalgo mui íntimu y personal. L’asturianu yera la llingua de mio güela. Una ayalga enllena d’alcordances y memoria. Una llingua enllena d’emoción. Y, agora que nun ta, una llave p’averame a ella.

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

La verdá ye que nun suelo tener nenguna “culpa” por sentir cualquier tipu de música. Ye más, encántame xugar colos clixés d’identidá asociaos a la música y reíme d’ellos. Ye como la xente que te xulga entrugando «¿á pero… nun conoces a esta artista? ¿Cómo nun la conoces?» Como si tol mundu tuviera que conocer o gusta-y la mesma música…

Sicasí, el branu pasao sentíu los primeros discos de Melendi con mio hermana, aquellos que tanto me prestaben de pequeña y abluqué con dalgunas de les sos lletres. Reímonos muncho de dalgunas palabres o frases que pasaron desapercibíes dafechu pesie a que, obviamente, conocémosles de memoria. Como cuando escucho cantares de los 2000 y píspome de que las lletres son super machistas y nun reparara nello hasta ahora. Y que, lo mesmo que con Melendi, el mio cerebru retuvo cada palabra. ¿Cómo formatear los nuesros cerebros nesos casos?

«Encantaríame conocer a Mapi Quintana, que pudiera sentir la mio música en concierto y tocar nel backstage: xugar xuntes coles voces, charango y contrabaxu. Ye una artista qu’almiro profesionalmente y que tien pinta de ser majísima»

¿A qué personaxe públicu convidaríes a un conciertu tuyu, a pasar llueu pel backstage y pa qué?

Encantaríame conocer a Mapi Quintana, que pudiera sentir la mio música en concierto y tocar nel backstage: xugar xuntes coles voces, charango y contrabaxu.  Ye una artista qu’almiro profesionalmente y que tien pinta de ser majísima.

Con xente que ta un poco más lloñe, nomaría a Silvia Pérez Cruz y Natalia Lafourcade. Dos grandes inspiraciones y ídoles pa mí. Sería un suañu que tuvieren ente’l públicu d’ún de los mios conciertos y poder cantar con elles los sos cantares más míticos.

Yá qu’escoyisti la to Banda Sonora Vital, vamos rematar con una Banda Sonora Orixinal. ¿De qué llibru n’asturianu prestaríate qu’hubiere una película a la qu’amás pongas-y tú la BSO?

La mio vida ye una novela. Un trabayu increíble de Paquita Suarez Coalla que foi al alcuentru de muyeres campesines asturianes. El llibru préstame pola vida porque ta trescrito tal cual les paisanes falen, caúna a la so manera ensin nenguna corrección normativa. Falen de guerra, de fame, d’amoríos, d’inxusticies, de fortuna. La realidá de muches de les nueses güeles y bisgüeles. Imaxínolo más como una serie onde cada episodiu seria la historia d’una d’estes muyeres. Sería un honor poder facer la música d’esti trabayu que yá m’inspira actualmente pa los mios cantares.

Asina fala Ana Pereda de los cantares qu’escoyó pa la so playlist

Okupar – LA TARRANCHA. Fai 13 años d’esti cantar y tamos na mayor crisis que vive Europa en rellación al derechu a la vivienda. Amás de pola so implicación politica siempre m’encantó l’ambiente de bon rollo que tienen nel escenariu y, por supuesto, la voz de Delfo Valdés. Si tengo qu’Okupar que culpa tengo yo.

El Capitalismu Mata – SONCAI SYSTEM. Conocí al grupu gracies al Anuariu de Música Asturiana. Esti cantar de influencies llatinoamericanas y en collaboración con Arma X y Sergio Rodríguez tien un mensaxe politicu y una potencia increíble.

Vaqueirada 1 – ANABEL SANTIAGO, ÁSTURA, ALBERTO VARILLAS. Esti cantar ta nel álbum Torner de 2005. Pa mín, un tesoru de la música asturiana. Gracies al trabayu d’estes artistes, descubrí’l tema ‘Vaqueirada 1’, que versionamos con LaGuinda como ‘Pandeiru’ y Llevólu’l Sumiciu como ‘Salir Moces a Baiḷḷar’.

Quítate Neña – ÚN DE GRAO. La música d’Ún de Grao ye una ayalga. La potencia de la so voz llega al alma y la dulzura cola qu’acompaña cola guitarra ye un regalu pa la música n’asturianu

La neige qui tombe – FABES DE MAYO. Esti grupu asturianu de música minimalista acompañóme en momentos de mio vida onde necesitaba precisamente eso. En ‘La neige qui tombe’ podemos imaxinanos un día d’iviernu onde tamos calentinos en casa mirando la ñeve caer. Pa mín esti grupu ye una caricia pal cuerpu. Son dulzura, tierrina, casa.

Ronda de Tarna – TUENDA. La voz d’Ambás ye memoria viva que nun muerre. Pa mín, la música tradicional ye una ferramienta pa viaxar al pasáu y entender cómo yera la sociedá notres époques. Nesti cantar d’amor vese reflexáu’l sistema tradicional, machista, onde’l matrimoniu ye la única manera de poder amar y el poder del padre ye la máxima autoridá y ta a la escontra de los derechos de les muyeres. Aun señalando esta parte machista espeyu de la so época, alcuéntrolo un cantar preciosu onde, pesie al tiempu, existe dalgo mui universal: la desesperación por querer tar cola persona qu’amamos.

Asturalia – DIXEBRA. Grupu emblemáticu de música n’asturianu que nun podía faltar. Esti tema tien 32 años, ye del álbum ¿Asturies o Trabayes? de 1993 y tovía, por desgracia, ye un tema d’actualidá. Fala del monocultivu d’ocalitos n’Asturies, una especie invasora que, por intereses económicos se planta y se permite nel norte del Estáu español. En 2025 y, depués de los grandes incendios d’esti branu, sigue siendo d’actualidá desixir al nuesu gobiernu curiar y protexer los nuesos bosques y árboles autóctonos.

De llonxe gano – SILVIA QUESADA. Silvia Quesada ye una grande de la música asturiana. Y este tema, un empoderamientu de la muyer nes ruptures d’amor.

Al pasar por el puertu – ALICIA VILLANUEVA Y LUIS ÁLVAREZ POLA. Col vozarrón d’Alicia Villanueva y los arreglos de pianu de Luis Pola, esti cantar respígame. Una xoya de la música asturiana.

Enraigonaes – FILANDA. Tócame barrer pa casa. Esti cantar d’Ánxela Gómez d’Avila ye parte del nuesu bebé Despeinando’l silenciu. Nun pueo facer una playlist ensin incluyilu yá qu’esti añu tamos d’aniversariu: ¡fai 10 años que lu publicamos! Esti cantar reivindica la llucha pola nuesa llingua, pola oficialidá. Somos un futuru enraigonau, qu’ensin llercia defende la nuesa llingua al llau.

Fandango de los deseos – ANTÍA ESEUVE. Siempre digo que tengo mucha suerte coles mios collacies y nun pue ser más verdá. En munchos sentíos. Nesti, una inspiración, un equipu increíble y una compañera de proyectu musical Templanza. Antía Eseuve ye una cantautora gallega que compón álbumes como churros. Tien una creatividá desbordante y unos temes que salen del coral, de lo sincero. ‘Fandango de los deseos’ ye ún de los mis preferíos.

Bordaz – TIKANIKI. Gracies a esti grupu llyonés (Francia), descubrí’l repertoriu de música maloyá, la música de la Isla de la Reunión, en llingua créole. Tuvi la suerte de xirar con ellos el branu de 2022. Percusión y armoníes vocales. Un repertoriu enllenu d’energía, trance y emoción.

Fuego Candela – PARRANDA LA CRUZ. Grupu llyonés de fusión de música maloyá y música venezolana.

Mujer Perfecta – PAMBELÉ. Grupu llyonés con raigaños na música colombiana y la psicodelia. L’instrumentu estrella ye la gaita colombiana, tocada por Luisa Cáceres.

Si no cantara – MARTA GÓMEZ feat LA COLMENA. Un cantar d’una de les mios referentes: Marta Gómez col grupu arxentinu de muyeres La Colmena. Un proyeutu colectivu de coru y percusión. Si no cantara, ¿qué pasaría si de un día para otro, no pudiéramos cantar?

Detrás de la puerta – SUSANA BACA. Cuando llegué a Perú, enamoréme del repertoriu de música afro-peruana. Un repertoriu que n’España nun se conoz lo que se debería, yá que-y debemos el caxón flamencu, inspiráu nel caxón de la música criolla y afro-peruana. Susana Baca ye una grande, sería un suañu vela en directo.

Derecho de Nacimiento – NATALIA LAFOURCADE. Derecho de Nacimiento ye pa mí un himnu d’esta musa!

Coucou – MERYL. Meryl ye una rapera y compositora d’una de les isles franceses: la Martinique. Canta en francés y en fréole, siendo una artista comprometida políticamente y símbolu de la llucha LGTBIQ+.

Pourquoi t’as fait ça – LADANIVA. Proyectu de música fraco-armení. La voz de Jaklin Baghdasaryan ye’l reflexu de la so historia y la de la so familia: una migración forzosa que los llevó hasta Francia onde sofita y homenaxea la música de la so tierra. Nesti casu, la lletra ye en francés, reflexando l’humor y la ironía de la cantante.

Santé – STROMAE. Multitude ye l’últimu discu de Stromaë, cantante y compositor belga conocíu mundialmente por ‘Alors on dance’. Publicólu en 2021 y cada canción ye una ayalga. Nesti casu ‘Santé’ ye un homenaxe a la xente trabayadora, un testimoniu de la llucha de clases. Na intro sentimos el charango, instrumentu peruano al que tanto-y debo y qu’inspiró tanto’l mio arte.