Musicasturiana.com cumple cinco años

Esti 2022 Musicasturiana.com cumplió cinco años. En xunetu de 2017 entamó les sos xeres de distribución dixital, n’ochobre abrió les sos redes sociales y el 25 de payares abrió la tienda online con más de 150 referencies a la venta. A lo llargo d’un llustru, esti proyectu que nació na emigración en Madrid del so responsable, Xicu Ariza, foi evolucionando, ampliando catálogu y algamando mayor repercusión. Agora mesmo son más de 400 referencies físiques les que tán a la venta y en plataformes dixitales distribuyéronse tamién más de 400 llanzamientos, faciendo asina un llabor de llevar la música asturiana física y dixitalmente a cualquier requexu de dientro y fuera del país.

Concretamente, fueron más de 70 los países a los qu’aportó’l catálogu de musicasturiana.com, con más de 3.000 referencies físiques vendíes -ente CDs, vinilos, llibros y camisetes- y más de 1.600 llanzamientos dixitales vendíos nes plataformes musicales. En cuantes a reproducciones, a día de güei son más de 30 millones les algamaes en aplicaciones como Spotify, YouTube o Apple Music. Too esti trabayu nun podría facese ensin el sofitu del públicu y de los más de 10.000 siguidores de Musicasturiana nos sos perfiles de Facebook, Instagram, YouTube y Spotify. Un pegoyu tamién son les más de 100 persones qu’en 2021 y 2022 s’asociaron a L’Ensame.

Dende que’l proyectu dio los sos primeros pasos nel 2017, nun paró d’evolucionar. D’esta manera, en 2019 impulsó la creación d’Amosando, el ciclu de presentaciones de discos en formatu íntimu, grabaos y emitíos per Internet, qu’axuntó hasta la fecha a 22 grupos d’estremaos estilos en cuatro ediciones qu’acumulen en YouTube más de 200.000 reproducciones. En febreru de 2020, un mes enantes del andanciu, el proyectu treslladóse de Madrid a Asturies, abriendo la oficina nel barriu d’El Natahoyo de Xixón; y en xunu 2021 foi más allá del llabor de tienda online y distribuidora dixital: reconvirtióse nel mayor portal dedicáu a la música n’asturianu y gallego-asturianu agospiando un mediu de comunicación, una axenda d’eventos, y a l’AMCA (Archivu de la Música Contemporánea Asturiana).

Próximos proyectos

Musicasturiana.com sigui trabayando pa caltener la so xera de promoción, difusión, dignificación y internacionalización de la música’l país, siempre desendolcando acciones pioneres. D’esta manera, por mor del so quintu aniversariu va poner en marcha dos nuevos proyectos, ún pal iviernu de 2023 y otru p’a lo llargo del añu que vien, de los que próximamente va dir informándose.

Dexa un comentariu

X