Musicasturiana.com sigue avanzando nel so llabor de «rescatar» de los trasteros referencies físiques de la música n’asturianu y poneles a disposición del públicu. Gracies al alcuerdu cola desapaecía discográfica Fono Astur, el catálogu d’esta tienda incorpora nueve vinilos orixinales publicaos ente finales de los años 80 y primeros de los 90. Son Grieska y el split de Dixebra; l’álbum homónimu d’Ubiña: Yera la princesa d’un país de Xentiquina; Canciois de fala d’Andolía: Inaux de Güextia y tres compilaciones d’asturianada: Antoloxía de la canción allerana, Tonada y Tonada 2. Los vinilos son de primer mano -anque nótase daqué’l pasu les décades per ellos-, hai unidaes llimitaes y suponen unes pieces de coleccionista de música rock, folk, pa la reciella y asturianada.
Ubiña foi una de les bandes pioneres del folk asturianu y nella tocaron nomes perconocíos d’esta escena como Xuacu Amieva, Pedro Pangua, Michael Lee Wolfe o Marta Arbas. Esti vinilu publicóse en 1988 y inclúi doce pieces.
Grieska ye’l primer discu que grabó Dixebra en 1990. Sicasí, la banda más veterana del rock astur yá grabara dos temes en 1989 pa un split compartíu con El Hombre que vendió el Mundo y Aborígenes. Son ‘Skandalera‘ y ‘Rapaza nacionaliega‘ les canciones que formen parte d’esta compilación grabada como premiu del concursu de rock Interbarrios qu’entamó en 1989 la conceyalía de mocedá del Ayuntamientu d’Uviéu.
Tamién hai música pa la reciella ente estes referencies. Per un llau ta l’álbum Yera la princesa d’un pais (1990) de la mítica formación Xentiquina, qu’inclúi 15 cantares de la formación capitaneada por Nacho Fonseca. Esta banda tuvo tamién un grupu homólogu nel Navia-Eo, Andolía, un coru formáu 16 rapacinos y rapacines de la fastera más occidental del país qu’usaron el gallego-asturianu como llingua d’espresión. El discu Canciois de Fala foi la única grabación que ficieron en 1993 y inclúi ocho cantares.
Volviendo al rock n’asturianu ta Güextia. El so cabezaleru foi l’escritor y xestor cultural Adolfo Camilo Díaz y, ente los sos componentes, alcontrábase’l míticu guitarrista Rafa Kas. Inaux foi l’únicu álbum que publicaron enantes de desfacese y nél compilen nueve temes de rock contundente, guitarreru y con unes lletres con un importante componente lliterariu. Un exemplu d’esto últimu ye que los testos son orixinalmente poemes de Dolfu Camilo colos que ganó’l Concurso Nacional de Canción de autor para Jóvenes Intérpretes, celebráu en Jaén en 1987.
Pa completar esta colección de vinilos de Fono Astur tán tres compilaciones d’asturianada. Antoloxía de la Canción Allerana ye una obra fundamental publicada en 1988 p’afondar nesti xéneru y nella participen cuatro cantadores: Jaime Caleya, Román Prieto, Veneranda Fernández y Tonín de Nembra. Tonada ye un vinilu publicáu en 1990 y ye’l resultáu del I Alcuentru de la Canción Asturiana, que tuvo llugar en Les Arriondes el 19 de mayu de 1989.Participen diez cantadores: Jorge Tuya Rivas, Luis Estrada Fernández, Mari Celi Fernández Palacio, Horacio Huerta Jove, Marcelina Cuesta Nachón, Mariluz Cristóbal Caunedo, Maximino Solís Lada, Socorro Noriega Quintana, José Manuel Collado Vidal y Josefina Argüelles. La so continuación, Tonada II, vien del II Alcuentru de la Canción Asturiana, que se fizo n’El Campu (Casu) el 23 de xunu 1990. Nél participen cinco cantadores –Avelino Fernández Corte, María Luisa Ordóñez, Elena Gómez Sampedro, Jose M. García Martín y Laudelino García Palicio-, Alberto Varillas a la gaita y la Banda Gaites y Tambores de Lleorio (Xixón).
Suscríbite a les nuestres novedaes
