Cantar nuevu de Nacho Vegas n’asturianu, “Añada de Lea”
El 13 de xineru salió en toles plataformes dixitales “Añada de Lea“, cantar nuevu del pernomáu cantautor xixonés Nacho Vegas. «Les añaes son canciones de cuna tradicionales asturianes y esti cantar tien les característiques propies del xéneru, pero al mesmu tiempu llevámoslu al nuestru terrenu», desplica’l músicu nun videu publicáu nes sos redes sociales. Tamién sorraya que, «como tolos cantares, tien una historia detrás», pero bromia añadiendo que «yá sabéis qu’hai coses que nun hai que cuntar».
“Añada de Lea” asoleya un añu dempués de la publicación de Mundos Inmóviles Derrumbándose, novenu álbum de llarga duración de Nacho Vegas en solitario qu’incorporó dos cantares n’asturianu con lletra firmada por Pablo Texón. Cola publicación d’esta añada, el xixonés -ún de los cantautores más reconocíos del panorama indie estatal y con milenta siguidores en Llatinoamérica- amplía’l llistáu de temes que compón n’asturianu. “Lluz d’agostu en Xixón” (Oro Salitre y Carbón, 2020), “A les rexes de la cárcel” (2019), “Hipopótamu Llambionótamu” (nel compilatoriu Bestiariu 2, 2016), “L’Afoguín” (Canciones Populistas, 2015), son dalgunes de les pieces que’l músicu interpreta dafechu na llingua autóctona y que s’amesten a otres con fragmentos n’asturianu como “Big Crunch” (Mundos Inmóviles Derrumbándose, 2022), “Aida” (Violética, 2018), o “Vinu, cantares y amor” (Canciones Populistas, 2015).
Amás, Vegas tien participao en proyectos musicales n’asturianu como Diariu, fechu a medies col músicu, escritor y realizador audiovisual Ramón Lluis Bande, y col qu’asoleyó dos discos en 1997 y 1999. Lucas 15 ye otra d’estes esperiencies cola que llanzó un discu de sonadía en 2008. Nella, él y Xel Pereda (Llan de Cubel, Felpeyu), reellaboraron temes del cancioneru popular asturianu dende una perspectiva de rock alternativu. Tamién el Coru Antifacista Al Altu La lleva, qu’acompaña al cantautor en dellos de los sos conciertos, grabaciones y acciones de denuncia, ye otru nome venceyáu a esti músicu qu’usa l’asturianu na so trayectoria.
Gracies a estos cantares y proyectos, a declaraciones públiques en defensa de la llingua asturiana, y a participar n’eventos como’l Conciertu Pola Oficialidá, Nacho Vegas ye ún de los nomes de la música fecha n’Asturies que, anque componga mayoritariamente en castellanu, visibiliza la realidá del idioma autóctonu dientro y fuera de les fronteres asturianes.
