Nacho Vegas llanza’l so trabayu nuevu, qu’inclúi dos temes n’asturianu escritos por Pablo Texón
‘Mundos Inmóviles Derrumbándose‘ ye’l discu nuevu de Nacho Vegas qu’asoleya esti vienres 14 de xineru. El cantautor xixonés regresa col so novenu álbum de llarga duración en solitario y nél destaca qu’incorpora dos cantares n’asturianu con lletra firmada por Pablo Texón. «Sé qu’él va munchos años que sigue la mio obra y llevo viéndolu dende 1996, que foi la primer vez que fui a un conciertu de Manta Ray», comenta l’escritor sobre l’orixe d’esta collaboración ente los dos.
«Cuando escribo lletres, siempre trabayo por encargu y eso ye lo que más me presta, ser a asumir una personalidá distinta de la mio ensin perder la identidá propia. Entós, eso de mano: Nacho pidióme una versión del “Summer’s end”, de John Prine y una añada cruel», desplica Texón. La versión “Muerre’l branu” namás se pue sentir nel discu en formatu físicu y l’escritor esclaria que s’adapta «al esquema métricu del orixinal de John Prine, pero la lletra ye nueva dafechu (nun ye una traducción) y nun tien nada que ver col orixinal. Ye un testu nuevu enllenu, por cierto, de referencies a la narrativa de Raymond Carver».
Sobre l’otru de los cantares n’asturianu del discu, “Un principiu de crueldá“, Pablo Texón añade que «ye una añada cruel y tráxica, con un títulu basáu nel conceptu acuñáu por Clément Rosser». «Nesti casu trabayé sobre la melodía tarariada por Nacho pa marcar la métrica», matiza l’escritor ayerán.
Compromisu llingüísticu
“Un principiu de crueldá” y “Muerre’l branu” súmase al llistáu de temes que Nacho Vegas -ún de los cantautores más reconocíos del panorama indie estatal y con milenta siguidores en Llatinoamérica- compón n’asturianu. “Lluz d’agostu en Xixón” (Oro Salitre y Carbón, 2020), “A les rexes de la cárcel” (2019), “Hipopótamu Llambionótamu” (nel compilatoriu Bestiariu 2, 2016), “L’Afoguín” (Canciones Populistas, 2015), son dalgunes de les pieces que’l xixonés interpreta dafechu na llingua autóctona y que s’amesten a otres con fragmentos n’asturianu como “Big Crunch” (Mundos Inmóviles Derrumbándose, 2022), “Aida” (Violética, 2018), o “Vinu, cantares y amor” (Canciones Populistas, 2015).
Amás, Vegas tien participao en proyectos musicales n’asturianu como Diariu, fechu a medies col músicu, escritor y realizador audiovisual Ramón Lluis Bande, y col qu’asoleyó dos discos en 1997 y 1999. Lucas 15 ye otra d’estes esperiencies cola que llanzó un discu de sonadía en 2008. Nella, él y Xel Pereda (Llan de Cubel, Felpeyu), reellaboraron temes del cancioneru popular asturianu dende una perspectiva de rock alternativu. Tamién el Coru Antifacista Al Altu La lleva, qu’acompaña al cantautor en dellos de los sos conciertos, grabaciones y acciones de denuncia, ye otru nome venceyáu a esti músicu qu’usa l’asturianu na so trayectoria.
Gracies a estos cantares y proyectos, a declaraciones públiques en defensa del asturianu, y a participar n’eventos como’l Conciertu Pola Oficialidá, Nacho Vegas ye ún de los nomes de la música fecha n’Asturies que, anque componga mayoritariamente en castellanu, visibiliza la realidá del idioma autóctonu fuera de les fronteres asturianes.
L-R, banda invitada en Xixón
‘Mundos Inmóviles Derrumbándose’ ye un discu qu’esti músicu xixonés compuso en Cuaña y por eso nun ye casualidá que la xira arranque’l próximu 28 de xineru nel Teatru Fantasio de Navia. Tres pasar per delles ciudaes del Estáu y Méxicu, va aportar al Teatru Xovellanos de Xixón el 4 de marzu. Nesti conciertu, pal que yá tán les entraes a la venta, el dúu post-folk L-R va ser la banda invitada p’actuar enantes que’l cantautor.
