Marisa Valle Roso presenta esti sábadu en Xixón el so discu nuevu “Lo Fugaz”
Yá ta na cai el tercer trabayu discográficu en solitario de Marisa Valle Roso, ‘Lo Fugaz‘. Nesti álbum, l’artista llangreana afonda nel camín abiertu col so anterior álbum ‘Consciente‘, entemeciendo canción d’autor y pop, y nel que per primer vez tolos temes son de la so propia autoría. El conciertu de presentación va ser esti sábadu 15 de xineru, a les 20h, nel Teatru La Llaboral de Xixón, y nél destaca que la banda que la va acompañar nel escenariu ta formada principalmente por muyeres.
Marisa Valle Roso ye una de les artistes más reconocíes d’Asturies y una de les grandes voces del país. Con namás 16 años ganó’l so primer concursu de tonada; al que siguiríen más de 30 premios nel ámbitu de l’asturianada, xéneru col que publicó los discos ‘Un Pasu Más’ -esti xunto al so hermanu Fernando, col que formaba’l dúu Hermanos Valle Roso-, y ‘De Lo Fondero l’Alma‘, el so debú en solitario. 2017 foi un puntu d’inflexón; asoleya’l discu ‘Consciente’, con temes que s’allonen de la tonada p’amestase al pop o a la canción d’autor, ente otros estilos.
‘Lo Fugaz’ ye la so tercer referencia. Producíu por Charlie Bautista (Christina Rosenvinge, Tulsa, Coque Malla…), amestáu por Iván González “Chapo” (MClan, Amaral, Deluxe…). y con dirección d’arte y fotografía de Vértigo Estudio, nel discu hai influencies de la música pop, folk, electrónica, canción d’autor, l’indie y tamién de la tonada, xéneru que Valle Roso domina a la perfección y ta presente de manera renovada nos cantares “Luna Vieja” y “Tonada“, cantar col que zarra l’álbum . Les lletres -esta vegada, toes en castellanu- falen de temátiques como la igualdá, l’amor, el mieu, la violencia de xéneru, o’l pasu del tiempu.
Conciertu presentación
El Teatru de la Llaboral de Xixón va acoyer esti sábadu 15 a les 20h el conciertu de presentación con un nuevu espectáculu. Pa la ocasión va tar acompañada por una banda formada principalmente por muyeres. Les instrumentistes Diana Erenas (voz, acústica y teclados), Xerach (voz, batería, loops y programaciones), Saray Saez (voz, percusión, loops y programaciones), amás de Charlie Bautista (dirección musical, voz, eléctrica y teclados); van tar xunto a Marisa Valle Roso pa repasar temes de la trayectoria d’esta artista llangreana y los que dan forma al trabayu nuevu. Les entraes tán a la venta na web www.marisavalleroso.com con un preciu d’ente 16 y 24 euros..
