LaKadarma presenta ElKalendariu de 2022 esti xueves en L’Apiaderu
Esti xueves 20 de xineru a les 20h el CSA L’Apiaderu d’El Remediu (Nava) va acoyer la presentación d’ElKalendariu de 2022 de la Banda Gaites LaKadarma. Nesta ocasión, el tradicional almanaque de la banda gaites entitúlase ‘¿Ónde ta Güeli?‘ y ta dedicáu a les güeles y güelos de los sos componentes y a les fiestes asturianes. Asina presenten dende la banda gaites esti calendariu que yá ta la venta por 14 euros na tienda online y qu’inclúi de regalu ElKalendariu 2020: ‘Dekadencia‘.
«Con tolo qu’echamos en falta les fiestes nesta temporada, ye normal que quixéremos alcordanos d’elles en #ElKalendariu2022.
Lo más prestoso ye que les güeles y güelos de #LaKadarma tamién decidieron salir de fiesta pa nun quedar en casa nengún día. De fechu, tuviemos qu’andar buscándoles nel nuestru particular “¿Ónde ta güeli?” al traviés de les pistes que nos dexaben en cartes y postales unviaes dende sitios estremaos, siempre metíes nos mayores xareos qu’hubiere. La busca foi emocionante, porque nos fizo alcontranos otra vegada cola maxa y l’allegría de les fiestes y xuntances que creyíamos perdíes.
Ye un almanaque, como davezu, compuestu por 7 fueyes peles dos cares, con 13 semeyes tipu “collage”, colos meses en grande y colos sos recuadros p’apuntar l’axenda y los planes de caún. Amiesta tamién el calendariu llunar, la transición de les estaciones, los cambios d’horariu y munches fiestes y efemérides»
