Va unos díes presentóse en redes sociales Tact, un cuartetu nuevu que trabaya cola música popular asturiana dende una visión contemporánea y cola particularidá de facelo a más de 1000 kilómetros de distancia d’Asturies; en Bretaña. La banda ta encabezada pola asturiana Clara Diez Márquez que, amás de cantante, ye la lletrista d’esta formación que ta acabante d’estrenar el so primer tema: ‘Veneno‘.
«El grupu ye un poco la secuela de Muga, con otru guitarrista y un batería amás de la voz y el vigulín. El repertoriu sigue siendo’l mesmu, repertoriu popular vocal d’Asturies y esta vegada toi animándomi a escribir lletres n’asturianu cola mesma filosofía que les cuartetes de la lírica popular asturiana«, desplica la Diez al rodiu la filosofía d’esti proyectu nuevu que va acuyá del camín qu’abrió con Muga hai dellos años, tríu col que llanzó’l discu Chants des femmes des Asturies.
Esta nueva llinia sonora respuende al oxetivu de «nun enmarcar la música de Tact na música tradicional«. «Queremos tocar en sales de conciertos y festivales de músiques actuales y amplificaes«, sorraya la cantante añadiendo que con Muga costó-yos «encaxar un poco pol fechu de tar na periferia estética y nun asumir claramente les coses». Agora, tiénenlo más claro, etiquen a Tact como post-punk y apellídenlu astur «nun guiñu a Dixebra y el so rock radical astur«, esclaria Clara Diez.
Con estes blimes, Tact ta acabante d’estrenar el so primer cantar, ‘Veneno‘. Ye ún de los dos temes que formen la maqueta que grabaron cola idea de «facer baillar al públicu, que sientan el trance de los drones y les saturaciones», como comenta la cantante y lletrista d’una formación que se completa colos músicos bretones Stephane Kerihuel (guitarra eléctrica), Jean-Félix Hautbois (batería) y Thomas Felder (violín)
Suscríbite a les nuestres novedaes
