Ocho conciertos de música asturiana pa festexar San Xuan
Esti xueves 23 de xunu ye la nueche de San Xuan, cita na que la música asturiana siempre tuvo abondo protagonismu con actuaciones p’acompañar a les fogueres que se prenden per tol país. Anque cada añu la programación de música de raigañu va perdiendo pesu frente a actuaciones d’orquestes y DJs, tovía queden fogueres nes que baillar al son de los ritmos del país. Esti 2022, tres dos años ensin cellebrar San Xuan por cuenta l’andanciu, actúen 6 Riales en Teberga; Vicente Díaz y Dixebra en Corvera; les bandes de gaites Villa de Xixón y Noega en Xixón; Bras Rodrigo n’Uviéu. Baxel en Caravia y Llevólu’l Sumiciu en Quirós.
El tríu de percusión tradicional 6 Riales va ser el primeru n’actuar nos actos pa festexar San Xuan. A les 22.30h van tocar na Plaza La Colegiata, en Teberga. Tamién a esa hora arranca la foguera de Tresona, en Corvera. Esta foguera ye una de les más populares, ta considerada Fiesta d’Interés Turísticu Rexonal y caracterízase por cuntar siempre con música’l país p’acompañar la quema. Esti añu actúen Vicente Díaz a les 22.30h y Dixebra a les 00:20h. Amás, Musicasturiana.com va participar nel eventu poniendo’l puestu de venta de merchandising de Dixebra xunto a otros de los discos que formen parte del catálogu de la tienda.
Xixón acueye delles fogueres nos barrios del conceyu, pero la que más sonadía tien ye la que se fai na playa d’El Natahoyo, en Poniente. A les 23h les dos bandes de gaites de la ciudá, Villa de Xixón y Noega, van actuar pa que la música de raigañu acompañe a la quema de la foguera. Tamién la gaita garra’l protagonismu na foguera d’Uviéu, col conciertu de Bras Rodrigo a la medianueche nel Parque d’El Campillín.
Fogueres del 25
Anque la nueche de San Xuan ye oficialmente’l 23 de xunu, hai otres fogueres que se cellebren de sábadu p’aprovechar el festivu del domingu. Ye’l casu de Caravia. Dempués d’una montonera d’años ensin facese, la Playa La Espasa vuelve acoyer la foguera y los conciertos, nos que’l rock siempre tuvo protagonismu. Esti añu actúen les bandes rockeres Mala Reputación -que tienen dalgún tema n’asturianu y siempre amosaron compromisu llingüísticu- y Fe de Ratas, xunto a Baxel, el dúu folk formáu por Paul Balmori y Rigu Suárez de Corquiéu, que va tocar el sábadu 25 a les 22h.
Pa rematar les actividaes, l’albergue d’Arroxo, en Quirós, monta una folixa de San Xuan na que, ente otros actos, va haber una pinchada del dúu d’electrónica de raigañu Llevólu’l Sumiciu. Va ser el sábadu 25 de 21.30h a 23.30h.
