«El celtismu ye la construcción intelectual sobre la identidá que calistró más fondamente y con más eficacia na mentalidá popular»

El pasáu vienres 17 de xunu l’espaciu autoxestionáu La Llegra d’Uviéu entamaba un actu  col títulu d’El celtismu musical asturianu. Un averamientu críticu, protagonizáu pol escritor y miembru de la Fundación Belenos Ignaciu Llope y el músicu y productor cultural Xune Elipe. La intención yera conocer cómo se desenvolvió históricamente’l celtismu musical en xeneral y la so influyencia y importancia nel casu asturianu, amás de dialogar sobre’l so estáu actual y les perspectives de futuru del mesmu. L’actu espertó l’interés de públicu abondosu qu’enllenó la sala, ente’l que había una representación de los pioneros del folk patriu como Xuan Prado (Beleño) y de les últimes xeneraciones d’intérpretes como Héctor Aneiros (Guieldu); dos nomes que faen una llinia continua dende los años 80 hasta anguaño na música asturiana.

Principiaba Elipe falando de porqué agora yera un bon momentu pa reparar nesta cuestión, rescamplando que tán dándose maneres nueves d’entender la música d’espresión asturiana, que vienen a arriquecela y diversificala tovía más, pero qu’existe cierto complexu al respective del celtismu, que vien a suxerir qu’ésti ta superáu y yá nun val como ferramienta amañosa pa la construcción de la identidá musical asturiana. El miembru de Dixebra y autor del ensayu Hai una llinia trazada. Historia de la música asturiana comentaba que nun yera necesariu «matar al pá» pa tener un discursu sonoru propiu; nesti sen, él mesmu fuere críticu nun momentu dau col maximalismu que se dio nos años 80-90, según el qu’emplegar una batería o una guitarra eléctrica salíase del canon celta asturianu, pero utilizar un bodhran o un buzuqui nun contenía nenguna contradicción. Pero ello nun quita pa que reconociere nel celtismu’l trampolín que permitió a la música asturiana evolucionar y internacionalizase, llevándola a cotes como nunca enantes na so historia. Otra manera, dixo que pa él tratábase d’una cuestión de calter políticu y que nun tenía nengún problema en reconocelo, el celtismu inxértanos nun marcu mui específicu: la Europa atlántica, mentanto que determinaes corrientes musicales alredor del folclor que se tán dando actualmente nel estáu tán siendo remanaes por un nuevu ‘españolismu’ que quier presentase como plural y respetuosu col diferente, pero que sigue calteniendo la premisa de que si quies trunfar tienes que pasar pel aru de Madrid (como metáfora del centralismu mediáticu y musical) y ser aceptáu nél. Darréu d’ello presentó al ponente de la charra, Ignaciu Llope, del que dixo que foi un elementu mui activu na conformación del celtismu musical (y en xeneral) asturianu, trabayando ideolóxica y lletrísticamente con Llan de Cubel, solliñando la importancia del so llabor na argumentación sólida y efectiva d’esta corriente, aportando les idees y los testos fundamentales pa poder entendela y percibir la so importancia.

«Existe cierto complexu al respective del celtismu, que vien a suxerir qu’ésti ta superáu y yá nun val como ferramienta amañosa pa la construcción de la identidá musical asturiana»

Escomenzaba Llope la so esposición con un vídeu d’una versión del cantar «Bella Ciao» interpretada pol grupu bretón Les Ramoneurs de Menhirs acompañáu del Bagad Kemper, y formulaba la entruga «¿Ye esto música celta?». De siguío, nuna pequeña introducción faló de cómo a la música celta presentábasela como un xéneru musical más, inventáu por Alan Stivell a mediaos de los años 70 del sieglu XX. Frente a ello emplegó’l conceptu de ‘territorialización’, nel que la música celta remite a unos llugares concretos: los finisterres atlánticos o naciones celtes (Irlanda, Escocia, Gales, Mannin, Cornualles, Bretaña -nos que caltienen o faláronse llingües celtes- Galicia y Asturies). Territorios nos que la música foi y sigue siendo una ferramienta na construcción d’identidaes nacionales.

Nel siguiente pasu na so ponencia introducióse na historia de cómo foi surdiendo’l conceptu de ‘musica celta’ a lo llargo de los sieglos; d’una manera mui documentada y enllena d’erudición faló de les primeres referencies a la mesma, de los pioneros escoceses o bretones y de los estudios actuales sobre esti asuntu. Nesti puntu foi perinteresante’l ver ver cómo la música de los países celtes foi pasando per distintos estadios: de música folclórica a tradicional, depués a ser un fenómenu popular y por últimu a convertise nun xéneru musical. Nes sos palabres: «El celtismu musical permitió l’adaptación de les músiques tradicionales d’esos territorios a la urbanización vertixinosa de la sociedá tradicional, y dar respuestes atractives y solventes a les nueves necesidaes que d’esi procesu surdíen». Yá entrando específicamente n’Asturies afirmó que la música celta asturiana «nun ye’l productu bastardu del Estáu de les Autonomíes», refiriéndose a que nun se trata de dalgo coyuntural como consecuencia d’un determináu momentu políticu y/o social, sinón que tien una base sólida y argumentada; pa él el celtismu en xeneral (non solo nel planu estrictamente musical) «ye la construcción intelectual sobre la identidá que calistró más fondamente y con más eficacia na mentalidá popular». 

«El mensaxe final foi claru y contundente: la música asturiana actual nun s’entiende ensin el celtismu musical»

Nel tramu final llegaron les conclusiones, ente la más significativa foi que’l celtismu musical, entendíu como metodoloxía, permitió que la tradición sonora d’esos territorios s’adaptare con éxitu a la modernidá, afirmando que «ensin esta evolución les músiques de los países celtes taríen n’arba de la desapaición». El mensaxe final foi claru y contundente: la música asturiana actual nun s’entiende ensin el celtismu musical.

La entruga del principiu contestóla Llope de manera rotunda, «sí», enantes de dar acabación a la charra con un vídeu de la formación gallega Baiuca y el tema «Morriña», como exemplu de la evolución y desarrollu permanente del celtismu musical. Darréu entamóse un coloquiu animáu ente los participantes, nel que s’afondó en delles cuestiones trataes nel actu y surdieron otros temes collaterales como l’espardimientu del discursu celtista ente la sociedá asturiana y la so aceptación popular, o les derivaes polítiques que consciente o incoscientemente tien la música.

Discos de música asturiana celta y folk a la venta na tienda