“Rozaes” ye’l single nuevu d’Alienda
El grupu folk Alienda llancen un cantar nuevu. Tres asoleyar el pasáu mes “Zanca de Cabra“, regresen agora con “Rozaes” un nuevu tema instrumental dedicáu al pueblu de Rozaes, en Villaviciosa, que yá ta disponible en toles plataformes dixitales.
«Rozaes tien una actividá importante venceyada a la música tradicional y sobre too les mazcaraes d’antroxu y col que dalgunos miembros del grupu tienen relación», comenta Fran Rodríguez, guitarrista de la formación. El músicu esclaria qu’esta pieza tien dos partes; «la primera, más reposada, en compás de 6/8, y al estilu de les marches tradicionales» ta compuesta pol guitarrista y llámase Marcha de Roces, n’honor al barriu xixonés nel que tienen el llocal d’ensayu. «La segunda parte compúsola Illán Escalada -el gaiteru- y ye un ritmu coxu dedicada a Rozaes, y da-y nome al cantar», añade.
Primer discu de llarga duración
«Siempre tuvimos en mente l’oxetivu de grabar un discu, tenemos material pa ello y agora’l nuestru enfotu ye acabar la grabación, que namás mos dio tiempu a grabar dos cantares, y dempués de que salga’l nuesu primer llarga duración, tamos naguando por tornar a los escenarios», el músicu resume asina los próximos pasos d’Alienda, una banda que sufrió’l «xarru d’agua frio de la realidá social del país» que causó «varies baxes de xente que coló d’Asturies por mor de trabayu o estudios». Agora, recuperaos del andanciu y con una mayor estabilidá nos sos componentes, van a por toes y con esti cantar nuevo lo demuestren.
