Trés meses dempués del llanzamientu del so segundu discu, La rabia nos dientes, el grupu punk-rock Ochobre llanza’l videoclip de ‘Escuela d’amor’. El tema escoyíu ye ún de los cantares d’esti discu nuevu que más sonadía tán algamando y les imáxenes son les de la so actuación el pasáu 10 de setiembre na Plaza del Paragües d’Uviéu dientro del ciclu Alaplaza de les Fiestes de San Mateo 2025. La obra audivisual ta realizada por Néstor Férnandez de la productora Báltico.
«Atopamos una escuela de vida, afitamos una escuela de llucha, forxamos una escuela d’amor. Esti ye’l nuestru homenaxe a la escena musical asturiana, esto ye pa nosotros la música«, desplicó Ochobre na publicación que fixeron en redes sociales p’anunciar l’estrenu del so segundu videoclip. El primeru ye ‘¡Autodefensa, Muyer!’, ún de los temes más populares de la formación punk-rock que salió a la cai dende l’entamu acompañáu d’esta cuidada pieza audiovisual.
D’otra banda, el próximu 15 de payares ye’l conciertu presentación de La rabia nos dientes. A les 20.30h la sala Gong d’Uviéu va acoyer un conciertu especial nel que la formación moza va tar acompañada d’Entretiempo, grupu madrilanu de ska-punk. Les entraes yá tán a la venta por un preciu de 10 euros en La Raposa (Uviéu), La Traviesa (L’Infiestu) y na web www.salagong.com.
Siete años dempués del so estrenu discográficu con Sobredosis de grisú, Ochobre llanzaron en CD y en toles plataformes musicales La rabia nos dientes. El discu ye un reflexu de la evolución granible que tuvo en tolos aspectos la banda más moza del rock astur, con nueve temes punk-rock y nos qu’hai pingarates d’otros sones como’l hardcore, celtic punk, la música tradicional asturiana, el punk melódicu, o’l metal. Too ello con unes lletres enllenes de mensaxe social, coinciencia de clase y de país.
Suscríbite a les nuestres novedaes
