El grupu de música celta Guieldu va estrenar esti sábadu 21 de febreru‘l so primer videoclip, que va poner imáxenes a ún de les temes más representatives del so trabayu discográficu, Memories de Deva. El cantar escoyíu ye ‘Laridenn eus Asturiez’, una xiraldiya asturiana abondo conocida que la banda reinterpreta dende una perspectiva contemporánea, meciendo lo asturiano col ritmu de la danza bretona y evocaciones del rock celta de los años setenta.
La realización del videoclip foi obra de La Fábrica de Humo, con Titi Muñoz na dirección, José Valle como responsable de la dirección de fotografía y Carlos Méndez na xefatura de producción. Un equipu con amplia esperiencia audiovisual que foi quien treslladar a videu la identidá intercéltica que define’l soníu de Guieldu.
El rodaxe tuvo llugar a finales de xineru en Candás y Verdicio, dos enclaves fondamente amestaos al imaxinariu marineru que define al cantar. «La lletra diz aquello de ‘Que soi de Candás y mio vida ta na mar’, asina que nun hubo meyor localización que la mesma villa candasina”, desplica la banda. El puertu Candás, les cais del so cascu urbanu y los cantiles de Verdicio conviértense asina n’escenarios protagonistes del videu, magar que tamién sirvieron de plató dellos llocales y dalgunos personaxes conocíos del llugar.
Ún de los aspeutos más singulares del proyectu ye la busca consciente d’una estética visual retro. Pa ello, l’equipu rodó en formatu 4:3 con lentes parfocales procedentes de vieyes cámares Betacam, una decisión técnica poco corriente que, xunto al trabayu de edición, recrea fielmente la testura visual de les televisiones d’enantes. «El resultáu son unes imáxenes cargaes de personalidá y coherente col calter evocador de la tema que vamos poder ver a partir del sábadu», añade’l grupu que va publicar el videu a les 10.30 hores na so canal de YouTube, onde van tar charrando en llinia colos siguidores que s’averen a la plataforma mentanto l’estrenu.
Con este videoclip, Guieldu da un pasu más na proyección del so discu Memories de Deva, catorce temes que percuerren los soníos de raigañu del Arcu Atlánticu, amestándolo a otros estilos como’l folk progresivu, la new-age, el folk rock, el funk o’l smooth jazz. Un cuidáu trabayu qu’entemez temes de composición propia y d’orixe tradicional nel que suenen muñeires, dances, reels, xirandiyes, set irlandeses… Lo qu’ellos definen como «los soníos más tradicionales de los finisterres atlánticos d’Europa», poniendo especial enfotu n’Asturies y siendo Avilés el puntu de partida d’esti viaxe interceltista.
Suscríbite a les nuestres novedaes
