El gaiteru Bras Rodrigo estrenó güei en YouTube y en toles plataformes musicales un tema nuevu, ‘La isla de los demonios’. Esta pieza ye la banda sonora del Festival y Desfile de San Patriciu de 2026 de Madrid, como lo fueron nos años anteriores otres composiciones d’esti músicu: ‘Búscame’ y ‘San Patricio’. Nestos dos temes andecharon Patricia Tapia (ex Mago de Oz) y Shan Corr y nesta ocasión el músicu carreñense arródiase de los irlandeses Tim Farrelly y Billy O´Callaghan, que toquen les gaites irlandeses y escoceses.
«Préstame cuasi siempre entamar con una intro y dempués dir aumentando la intensidá», desplica Bras Rodrigo sobre’l soníu d’esti tema de música celta y folk-rock. Asina ye como’l gaiteru comenta que la pieza «tien dos partes bien estremaes. La primera ye una especie de marcha y ta tocada con uillean pipe y flauta y tamién metemos una gaita asturiana en re. La segunda parte ye una muñeira onde los pies nun pueden parar de movese y metemos gaita asturiana en sib y gaita escocesa».
Na grabación del tema y del videoclip participen los mentaos Tim Farrelly y Billy O´Callaghan, una collaboración de la qu’asina fala Rodrigo: «surdió porque l’añu pasáu traximos al Desfile de San Patricio de Madrid a la Banda de Gaites St. Joseph’s Pipe Band de Clondalkin en Dublín y Tim yera’l director y Billy ún de los gaiteros. Fiximos bones migues col mio primu David Gómez “Deivis” como mayestru de ceremonies -que ye’l másimu espertu qu’hai en Bandes de Gaites y del que fue la idega de trayelos-, y cuando-yos propunxi facer una collaboración tuvieron encantaos». «La esperiencia foi estraordinaria y mui prestosa» añade’l tamién director de la Banda Gaites de Corvera sorrayando que «gustó-yos tanto’l tema que quixeron meter les dos gaites».
El videoclip realizáu por Juan Carlos Arévalo (Arte Visual) y con imáxenes grabaes en Dublín y Madrid entama con una lleenda animada de la qu’asina fala Bras Rodrigo: «Enteréme d’ella de boca de Laura Ní Raghallaigh (O’Really) que ye una collacia irlandesa que vive en Madrid y collabora con nós na organización del eventu. Como sabe que me presten les histories máxiques, medievales y de fantasía nes que me baso pa facer les mios composiciones y qu’amás tamién dempuésles voi desplicándoles nos conciertos, cuntómela pa ver si m’inspiraba dalgo. Inspiróme tanto que-y fixe un tema enteru. Y ye que la lleenda ye mui guapa». Nel propiu videu pue lleese la historia acompañada d’imáxenes d’animación.
Suscríbite a les nuestres novedaes
