Payares despídese con 14 conciertos de música asturiana
El mes de payares remata con actividá musical enforma nel occidente y centru del país. Dende esti xueves 24 hasta’l próximu domingu 27 va haber catorce conciertos d’estremaos estilos dientro de la música n’asturianu y gallego-asturiano: rap, electrónica, bandes de gaites, bandines, folk, canción d’autor y blues van sonar en Xixón, Castrillón, Llanera, L.lena, Grau, A Veiga.
En Xixón, el conceyu col Ayuntamientu que más música asturiana programa, van siguir nel Muséu del Ferrocarril los X Alcuentros de Músiques Asturianes coles actuaciones de Bimenes Underprau (xueves 24 a les 20h) y Llevólu’l Sumiciu (vienres 25 a le 20h). Amás, la Fundación Municipal d’Educación y Cultura tamién entama un conciertu del tríu Calea nel patiu del Centru de Cultura Antiguu Institutu pal sábadu 26 a les 19.30h y dende la iniciativa privada, el Páramo Bar -llocal que siempre puxó pola música y la llingua asturiana- acueye un conciertu de Diañu Blues el sábadu a les 20h.
Castrillón sigue festexando’l venti aniversariu de la so banda de gaites y por eso nel Valley Centru Cultural va poder vese l’espectáculu Tradicionando (xueves 24 a les 20h), un conciertu de Felpeyu (vienres 25 a les 20h) y l’actuación XX Aniversariu de la Banda Gaites Castrillón, nel que van cuntar con delles collaboraciones (sábadu 26 a les 20h). El sábadu tamién Grau va baillar al ritmu de la tradición cola Seronda en Danza, eventu nel qu’actuen les bandines La Garrapiella, L’Andecha Turcipié y Ambás ya Ramsés magar les 21h nel Polideportivu Municipal de la villa. Amás, nel Centru Infancia ya Mocedá La Panera va haber a les 17h un taller de pandereta impartíu por Ramsés y a les 18.30h unu de baille tradicional empobináu por Xandru y Paz.
Actividaes de la Conseyería
Tamién la Conseyería de Cultura, Política Llingüística y Turismu entama delles actividaes nesti últimu fin de selmana del mes. El sábadu 26 Llanera acueye la Seronda Moza na que va haber un conciertu de Llevólu’l Sumiciu y una jam session empobinada por Ún de Grao, ente otres actividaes; y esi mesmu día n’A Veiga, nel Xuntoiro, va estrenase l’espectáculu A Lluz, Orión e a Nova Lluz de los hermanos Miguel y Andrés Rodríguez Monteavaro. El cantautor Toli Morilla actúa nel Teatru Vital Aza de L.lena dientro del circuitu Asturies Cultura en Rede y, per último, nel Paraninfu de La Llaboral van tocar Algaire‘l domingu a les 13h.
*Na semeya la bandina La Garrapiella.
