La Banda Sonora de Xaime Martínez
Xaime Martínez (Uviéu, 1993) ye músicu y escritor. Ye’l cantante y guitarrista de La Bande, amás de tener el so proyectu en solitariu col qu’asoleyo’l discu-llibru Ósculos d’Agua nel Imperiu Asturianu, un trabayu de renome que caleya pel pop anglosaxón, el folk estaunidense, la música alternativa y la tradicional asturiana. Como poeta publicó delles obres y ganó’l premiu Poesía Joven Miguel Hernández en 2019
Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.
Sienti la playlist La Banda Sonora de Xaime Martínez
Un discu qu’enxamás canses de sentir.
El Tapestry de Carole King tienme salvao la vida más d’una vez.
Si tuvieres que formar parte d’otru proyectu musical, ¿cuál sería?
Encantaríame facer parte d’una second line de Nueva Orleans.
De los cantares que compusisti o interpretes, ¿cuál ye’l to preferíu?
Voi cambiando (los discos más antiguos danme más vergoña). Agora seguramente sía «Violencia nos caminos de la ciudá de Graceland, según Xosefa Xovellanos».
«Siempre me llama l’atención que somos los últimos en cobrar (si cobramos). Mesmo como escritor que como músicu»
¿Cuándo foi la primer vez que xubisti a un escenariu y que pasó enantes, durante y depués?
Alcuérdome bien del mio empiezu na música pop. Foi tocando «Blitzkrieg bop» de los Ramones nuna actuación de la escuela. Yo yera teclista y nun teníemos cantante, asina que la versión yera rarísima. Cuido que diz muncho de quién soi agora como músicu.
¿Qué ye lo más inxusto de ser artista?
Nun sé si lo plantegaría en términos de xusticia. Pero siempre me llama l’atención que somos los últimos en cobrar (si cobramos). Mesmo como escritor que como músicu, veo que les perres van pa tola xente que fai posible que l’arte llegue al públicu: el que fai’l soníu, monta l’escenariu, edita’l llibru y lo distribúi cobra; lo que taría mui bien si tamién llegaren les perres al artista. Pero munches veces supónse que nós facémoslo por amor al arte. ¡Como si l’arte fore gratis!
Si fueres Conseyeru de Cultura, ¿qué son les primeres coses que fadríes?
Nun tengo la menor idea. Cuido que la política institucional ye un arte bien difícil, y tendría que lo estudiar.
«A La Cirigüeñá, de críu, sentíalos facer eses versiones increíbles n’asturianu de clásicos del pop y almirábame la capacidá que teníen pa cuntar histories nueves a partir de les melodíes d’otros»
Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?
Pues mira, voi dicite que La Cirigüeña. De críu, sentíalos facer eses versiones increíbles n’asturianu de clásicos del pop y almirábame la capacidá que teníen pa cuntar histories nueves a partir de les melodíes d’otros.
Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?
Nun soi muncho de placeres culposos, en verdá. Escucho coses qu’igual dende fuera paecen rares, pero nes que pienso que siempre topo daqué d’interés. Por exemplu, agora toi escuchando munchos cantarinos de nadal, que ye un xéneru que me presta pola vida.
¿A qué personaxe públicu convidaríes a un conciertu tuyu, a pasar llueu pel backstage y pa qué?
A Víctor Manuel, pa facer una versión glam de «Nel portalín de piedra».
Yá qu’escoyisti la to “Banda Sonora Vital”, vamos rematar con una Banda Sonora Orixinal. ¿De qué llibru n’asturianu te prestaría qu’hubiere una película a la qu’amás pongas-y tú la BSO?
Tayu, d’Alejandro Fernández-Osorio, creo que daría pa una película guapa, y podría amestáse-y una versión del «Sixteen tons» al estilu de José Guardiola.
Semeya d’Estrella Jover.
