Picarós tán nominaos nel concursu Runas 2024 y necesiten votos online pa poder tocar n’Ortigueira

Tres participar l’añu pasáu Alienda y Guieldu, esti añu vuelve haber representación asturiana nel Concurso Runas del Festival Internacional do Mundo Celta de Ortigueira. L’eventu más importante del xéneru na Península Ibérica ta acabante d’anunciar la edición númberu 24 d’esti certame pa grupos noveles y, d’ente les diez bandes nominaes, hai una asturiana: Picarós. Pa poder pasar a la fase final del concursu -na que van participar tres formaciones – necesiten ganar la votación online.

Picarós ye un tríu folk formáu nos valles del Trubia en 2021 por Iván Álvarez (gaites asturianes, gaita MIDI, whistles y voz), Daniel de la Nava (guitarres) y Chus Fernández (bodhrán). Ente les sos influencies tán formaciones asturianes y foriates como Flook, Michael McGoldrick, Tejedor o Llan de Cubel y el so repertoriu caracterízase sobre manera pol protagonismu de temes de composición propia qu’entemecen la esencia de la música tradicional con elementos contemporáneos a traviés de la esperimentación sonora y l’amiestu de xéneros.

Na páxina del Concurso Runas pueden sentise cuatro pieces de la formación grabaos nos Tutu Estudios de Corvera: “Muñeira de Carapijo / Muñeira da punta Vicaño”, “Nalió”, “Picarós” y “Xugabolos”. Agora mesmo Picarós tán na quinta posición del certame con un 12% de los votos. La votación pue repetise cada 24 hores dende dispositivos estremaos -ordenador, teléfonu, tablet-, y los tres finalistes van tocar dientro del festival d’Ortiguiera ente’l 11 y el 14 de xunetu. Quien gane nesa final, tien garantizáu un conciertu nel escenariu principal pa la edición de 2025.

Dexa un comentariu

X