La Banda Sonora de Miguel Fernandi ‘Burilo’

Miguel Fernandi Burilo (Lluanco, 1979) lleva venceyáu al punk-rock n’asturianu dende l’adolescencia. Yá nel institutu foi cantante de Xorrez; con 20 años de Llaceria Rock y dende 2004 ye bien conocíu per toa Asturies gracies al so llabor como frontman de la banda ska-punk Skama la Rede, formación qu’anguaño ta celebrando’l so venti aniversariu y que va asoleyar un discu-llibru nuevu a finales d’añu. Amás de cantante, ye llocutor radiofónicu nel programa Tiempo Añadido de RPA y foi ún de los pioneros en radiar partíos de fútbol n’asturianu en Radio Sele.

Con él siguimos cola estaya “La Banda Sonora De…“, una serie d’entrevistes de personalidá acompañaes d’una playlist de Spotify na que cada persona entrevistada escueye los 20 cantares que más-y presten.

Sienti la playlist La Banda Sonora de Miguel Fernandi Burilo

Un discu qu’enxamás canses de sentir.

Ante todo mucha calma de Siniestro Total. Sélo de memoria. Dende l’adolescencia hasta agora. Teníalu na dómina del institutu grabáu nuna cinta qu’acabó rallada. Va unos años comprélu en vinilu. Pa mi ye’l meyor discu en directu del punk-rock estatal.

Si tuvieres que formar parte d’otru proyectu musical, ¿cuál sería?

Mira, tenemos hasta páxina en Facebook d’un grupu que nunca llegamos a facer y que se llama Too xunto gloria. Medio en coña, medio en serio, falara del asuntu con Fonsu Sánchez (baxista de Skama La Rede) y con Carlos García Villamil (guitarrista de Skontra) pero nunca consiguimos un batería. La idea yera facer versiones punkis de cantares de Zapato Veloz o Vicente Díaz. Vamos, como Me fritos and the gimme cheetos pero con repertoriu asturianu. Nunca salió nin va salir.

Cada vegada tengo más claro que cuando acabe Skama La Rede -creo que tovía tenemos cuerda pa estirar- acabarán los escenarios pa mi. Polo menos, con un grupu nuevu.

De los cantares que compusisti o interpretes, ¿cuál ye’l to preferíu?

“Ella nun escaez” abúltame’l cantar más redondu que ficimos con muncha diferencia sobre los demás. Nun tengo nenguna dulda que si en cuenta de sacalu nel 2019 saliera nel primer discu sería’l cantar preferíu de los nuestros siguidores… Claro qu’en 2005 igual nun sabíemos facer esti tipu de cantar.

«La primer vez que xubí a un escenariu foi nel festival de navidá que se facía na escuela en Lluanco. Diríemos a sestu de la EXB y ficimos un playback del “Nun yes tú” de Los Berrones. Sentímonos como estrelles y namás yera un playback»

¿Cuándo foi la primer vez que xubisti a un escenariu y que pasó enantes, durante y depués?

Pues la primer vez foi nel festival de navidá que se facía na escuela en Lluanco. Diríemos a sestu de la EXB y ficimos un playback del “Nun yes tú” de Los Berrones. Fuera na desapaecida Discoteca Maite -munchos años depués tocaría ellí dos veces con Skama-. Joder, sentímonos como estrelles y namás yera un playback. Muertos de mieu primero d’entamar, alucionaos cola xente baillando mentanto’l cantar y coles crítiques positives de depués. Yéremos unos neños y flipábemos. Quién me diba dicir que depués d’asonsañar a Ramón… Diba acabar cantando con él como convidáu.

¿Qué ye lo más inxusto de ser artista?

Probablemente que ye jodío vivir d’ello. Yo tengo otru trabayu y pa mi ye un divertimentu. Pero veo a xente pasándolo mal pa llegar a fin de mes.

Si fueres Conseyeru de Cultura, ¿qué son les primeres coses que fadríes?

¡Dimitir! Nun tengo nin idea. Asina a bote pronto procuraría que delantre de toles actuaciones de grupos ‘de fuera’ que se paguen con perres públiques tocase un grupu asturianu.

«Procuraría que delantre de toles actuaciones de grupos ‘de fuera’ que se paguen con perres públiques tocase un grupu asturianu»

Enantes de ser artista de la música asturiana, de xuru que sentisti o visti en directo a más compañeros y compañeres d’esta escena. ¿Quién te marcó y t’animó a xubir al barcu de facer música n’asturianu?

Dixebra. Aquella primer cinta que me pasaron nel institutu col primer discu y un directu grabáu creo que n’El Fontán. Foi mui claro, «yo quiero facer un grupu como estos».

Yá conocemos les tos recomendaciones y influencies… agora toca que te confieses: ¿cuál ye esi cantar o esi grupu qu’escuches culposamente “na intimidá”?

Pues si mires la estantería de mio casa tengo bastantes coses que se salen del punk-rock. Pero nun sé dicite. Regalé-y a la moza un vinilu de C Tangana y dalguna vez póngolo yo en casa. Cuando en dalgún chigre me dexen poner discos, siempre acaba sonando Bertín Osborne… Pero eso yá ye provocación. Un día voi mamales.

¿A qué personaxe públicu convidaríes a un conciertu tuyu, a pasar llueu pel backstage y pa qué?

Almiro muncho a Fermín Muguruza. Igual a él. Pero tampoco soi yo de munchos ídolos anque tengo dos fotos con Evaristo Páramos que me faen especial ilusión. De toes formes, al nuestru backstage puede venir quién quiera.

Yá qu’escoyisti la to Banda Sonora Vital, vamos rematar con una Banda Sonora Orixinal. ¿De qué llibru n’asturianu prestaríate qu’hubiere una película a la qu’amás pongas-y tú la BSO?

Tengo dos. A una yá taría puesta que sería’l cantar “Querémoste equí” pal llibru Amarraza de Fernando González. Pa otru, prestaría muncho que sería Incorrectos del nuestru lletrista David Artime Roxu.

Asina fala Miguel Fernandi Burilo de los cantares qu’escoyó pa la so playlist

Los Berrones – La del Estudiante. Ye una putada ser fan de siempre de Los Berrones. Cuesta escoyer namás un cantar.

Dixebra – Da-yos caña. El primer cantar que sentí de Dixebra. Lo dicho, yo quería tener un grupu como esti. Foi un descubrimientu tamién no ideolóxico. Tenía bien claro que nel discu ‘Salú ya dixebra’ teníemos que grabar nosotros esti cantar.

Llan de Cubel – Cabraliega. Nun soi yo demasiáu folki. Tampoco anti, ¡eh! Pero tengo l’alcordanza de que ‘Cabraliega’ siempre sonaba cuando parábemos en Candás en La Gueta. Nun había día que nun se sintiera en chigre. 

Karne Antisocial – Borrachos y dinamiteros. Por edá, tocó descubrilos depués de que lo dexaren. Esti cantar siempre lo toquemos nel repertoriu de Llaceria Rock y consiguimos cuando nos reunimos pal venti aniversariu que lo cantara con nós Lolo Muñiz, el so autor y vocalista.

Balandrán – Onde la mar. Pa mi, el meyor cantar n’asturianu de la historia. Tiene daqué esta canción.

Rodrigo Cuevas – CÓMO YE?! El punki Rodrigo. Sí, el punki. El más punki d’Asturies.

La Tarrancha – Presente indicativu del verbu nun trabayar. Son unos cabrones, nun la toquen yá nunca.

Avientu – Llicenciáu en barricaes. Cuando tábemos con Llaceria Rock pa entrar a grabar la nuestra maqueta, Xune Elipe enseñóme’l master del tercer discu d’Avientu que taba yá na fábrica. Joder, queríemos sonar como ellos… Y nunca lo consiguimos.

Nuberu – Asturies, tiempu de nosotros. Simplemente Nuberu.

Músicos pola oficialidá – Llegó la hora. Tuvi la suerte de participar en dellos cantares d’esti proyectu. Nesti non y paezme’l más guapu… Y el que más me respiga. Sacóse nun momentu nel que tuviemos a piques d’algamalo pero Foro…

Siniestro Total – Assumpta. La banda sonora del institutu.

QKortatu – Sarri, Sarri. La Universidá.

Gatillazo – La última patada. Siempre fui más de Gatillazo que de La Polla Records. Soi asina de raru, insultáime si queréis. (Y aborrezo Tropa do Carallo, anque Evaristo siguirá siendo dios siempre).

Boikot – Despaldas al mundo. Muncho Boikot, ho. ¡Qué pasa familia!

Obrint Pas – Viure. Tovía me manca que se separaren. Referentes. 

Reincidentes – Los hijos de la calle. Un grupu al que sentí hores y hores na mio adolescencia y al que fui abandonando pasu ente pasu. Por embargo, esti cantar de 2020 paezme de lo meyor que tienen espublizao en tola so historia.

Fe de Ratas – Hasta la victoria. Buf. Na dómina qu’entamó a dase conocer Fe de Ratas yera cuando la xente de Lluanco salíemos de comedia per Avilés. Vaya brasa que-yos dábemos a Maxi y compañía… Tienen el cielu ganáu.

Dropkick Murphys – I’m shipping up to Boston. De mayor quiero sonar en directo como ellos (y deprender a escribir bien el nome ensin miralo).

Ezetaerre – Non é  verán de Estrella Damn. Por causes desconocíes foi la nuestra canción en casa mentanto’l confinamientu. Nun sé les veces que pudimos poner el videoclip en Youtube.

Mala Reputación – Abriendo camino. Nel oriente saben facer cantares, ho.

Semeya cedida por Nuno Feliz.

Mercar discos de Skama la Rede

Dexa un comentariu

X