En 2007, Herbamora afitó la Pandereta Revolution n’Asturies coles doce pistes del discu ¡Sali, L.luna!. María Gavieiro Álvarez, Paula Cristóbal Caso, Natalia Nuño Rodríguez, María Vázquez Álvarez y les ex componentes Tatiana Fernández y Carmen Trevías ximielgaron la escena y allumaron el camín del instrumentu na búsqueda de sonoridaes nueves, apurriendo harmoníes y xuegos na parte vocal, al mesmu tiempu que fusionaben les melodíes tradicionales cola electrónica, el jazz, el funk o el rock na instrumentación.
P’afondar nello, falamos con Loreto Suárez (Algaire, Grupu Folclóricu Prau Llerón) y Laura Ruiz González (Pandereteres de Fitoria, Grupu de Baille Tradicional de Fitoria, Escuela de Música Tradicional El Ventolín, De Cotía), dambes pandereteres, cantadores y bailladores que, conociendo enforma los vezos de la tradición musical asturiana, buscaron el so propiu camín nos sos proyectos. Con esti álbum siguimos la estaya de discu del mes na qu’analizamos dalgunos de los trabayos discográficos más destacaos de la música asturiana, acompañándolos d’una ufierta na tienda online.
¿Qué elementos del discu foron los más especiales o novedosos?
Pa min, qu’un grupu de pandereteres n’Asturies, que veníen de la parte más puramente tradicional, creara un discu xunto con otros instrumentos utilizaos davezu pa otros estilos musicales y, qu’amás d’eso, ficiera tou tipu de xuegos vocales ensin nengún complexu nin prexuiciu, creo que foi la parte más arriquecedora y especial d’esti proyectu.
Toes tenemos claro que na tradición asturiana nun esiste’l modelu de «grupu de pandereteres» para dirixir el baille, sinón que como muncho cantaben en pareya, y que muncho menos lo facíen utilizando harmoníes. Qu’Herbamora rompiera con esi mantra y decidiera actualizar y modernizar esa visión de la figura de la panderetera, xubiéndola a los escenarios como l’elementu principal y sacándo-y tol partíu posible al potencial vocal en favor del espectáculu, foi daqué novedoso dafechu n’Asturies y daqué inspirador pal restu de pandereteres.
Cola perspectiva d’estos cuasique 20 años dempués, ¿qué semiente quedó d´aquello? ¿Cómo evolucionó la so idea n’otres propuestes?
Dende’l mio puntu de vista, pienso que lo que fixeron va cuasi yá venti años foi asitiar unes bases y abrir les puertes qu’equí, naquella dómina, inda nun taben abiertes a les xeneraciones futures que vinimos detrás.
Daquella, Asturies taba somorguiada na era de la gaita y la figura de la panderetera nos grupos folk yera puntual. Pa poder sentir daqué asemeyao que saliera de lo puramente tradicional teníes que mirar fuera d’Asturies. Alcuérdome, por exemplu, d’escuchar mientres hores y hores a les gallegues Faltriqueira, intentando reproducir cada toque y caúna de les llinies vocales de los sos temes. Encantábame y, amás, creo que m’ayudó enforma a la hora de buscar el mio sitiu.
El fechu de qu’apaeciera daqué asemeyao n’Asturies entendílo como una declaración d’intenciones; yera un dicir “¡Oi, nós tamién sabemos, podemos y queremos!».
«Asturies taba somorguiada na era de la gaita y la figura de la panderetera nos grupos folk yera puntual. El fechu de qu’apaeciera dalgo asina entendílo como una declaración d’intenciones»
¿Qué cantar del discu destacaríes y por qué?
Si tuviera qu’escoyer namás un cantar d’esti discu, quedaríame con ‘Ruxe’l ríu‘. Pienso que resume perfeutamente la esencia d’esti trabayu, axuntando programaciones, banda, arreglos vocales y demás nun mesmu tema, daqué único naquel momentu.
¿Qué elementos del discu foron los más especiales o novedosos?
La publicación del discu fizo que pudiéremos ver la música tradicional dende otru puntu de vista. Avezaes a grupos de pandereteres que namás interpretaben un repertoriu puramente tradicional, ¡Sali, L.luna! amuesa que la fusión de tipos estremaos de música con rasgos funk, rock o jazz dan una imaxe nueva de la música de raigañu, faciendo que garrara un camín nuevu, averándose a la música d’anguaño. Empondera’l mundu de la pandereta y la panderetera, equiparándolu al d’instrumentos como la guitarra, el baxu o’l pianu.
«La publicación del discu fizo que la música de raigañu garrara un camín nuevu. Emponderó’l mundu de la pandereta y la panderetera, equiparándolu al d’otros instrumentos»
Cola perspectiva d’estos cuasique 20 años dempués, ¿qué semiente quedó d’aquello? ¿Cómo evolucionó la so idea n’otres propuestes?
Creo que tuvo una repercusión grande alredor de la pandereta y la canción tradicional. La propuesta qu’elles ficieron cola publicación d’estos cantares foi bien acoyida, de manera que munchos otros grupos que vinieron dempués apostaron tamién por esti tipu de música más ecléctica, incorporando, amás d’instrumentos que nun tienen que ver cola tradición asturiana, cantares nuevos, pero siempre con esi encantu de la música propia del nuestru país.
¿Qué cantar del discu destacaríes y por qué?
El cantar que más me presta ye ‘Vinu traidor‘. La dulzura cola que canta María Gavieiro al entamu y el cambiu de ritmu al entrar dempués les panderetes, el pianu… faen que pueda sentilu una y otra vez.
Suscríbite a les nuestres novedaes
