La música asturiana cada vez tien más presencia n’estudios académicos de dientro y fuera d’Asturies. Ún de los llugares onde más puxu ta teniendo esta cuestión ye n’Estaos Xuníos, país onde ta desendolcando un importante llabor el grupu d’investigación Asturian Studies – SAnTINA (Sociedá pal Análisis de Temes culturales ya Identidaes llingüístiques n’Asturies). Esti martes 4, a les 17h (hora asturiana) va ser la próxima actividá dedicada a a esta cuestión nun actu de la Universidá de Massachusetts Amherst. Nella Leticia Baselgas , Llorián García y Isabel Álvarez Sancho van falar de ‘Tradición y modernidá na música asturiana‘.
Cualquier persona pue apuntase a ver online esta mesa redonda rexistrándose nesti enllaz http://bit.ly/4gwMUVw. L’actu ta organizáu por Eva Álvarez Vázquez y Tomás Estrada Hevia. Dambos son graduaos en Filoloxía Hispánica pola Universidá d’Uviéu. La primera ta acabando la so tesis sobre estudios culturales d’Asturies y d’otros llugares del Estáu español, centrándose nel cine y na desindustrialización; mentanto que’l segundu quier facela alredor de la música asturiana y el romanceru. Con esta actividá quieren reflexonar sobre l’auxe que ta teniendo la música popular n’Asturies y les formes nueves d’espresión.
Pa a ello van tar acompañaos dos de los músicos y académicos más reputaos del país: Leticia Baselgas (componente de L-R y Calea, Doctora en Historia del Arte, autora de Diarios d’una panderetera) y Llorián García (gaiteru, miembru de Dixebra y musicólogu que recientemente presentó la so tesis dedicada a la Nueche en Danza). Xunto a ellos ta Isabel Álvarez Sancho, profesora d’Estudios Hispánicos na Universidá de Oklahoma State y presidenta de SAnTINA.
La institución académica que acueye l’actu ye la Universidad de Massachusetts Amherst, la mayor universidá pública de Nueva Inglaterra y onde anguaño son estudiantes de doctoráu y profesores de llingua, lliteratures y cultures del mundu hispanófonu la l.leniza Eva Álvarez Vázquez y el navetu Tomás Estrada Hevia. Col so llabor, faen por que s’esparda pel mundu la cultura asturiana d’antaño y anguaño.
Suscríbite a les nuestres novedaes
