El próximu 12 d’agostu Asturies va volver vivir un eclipse total de sol, un fenómenu que nun se repitía dende 1905. El grupu de música tradicional renovada Herbamora aprovechen esti fechu pa poner imáxenes a ‘Eclipse total’, ún de los temes que recueye’l so discu últimu, 286 llunes. Tres d’estrenalo’l domingu na XXVII Nueche Celta de Granda (Xixón) yá pue vese en YouTube.
‘Eclipse Total’ ye un llixeru de Payares con lletra del propiu grupu y, na obra audiovisual que van estrenar, treslladen esti acontecimientu estraordinariu del eclipse al universu de la fiesta prau, la espresión más viva de la celebración comunitaria y heredera de vieyes tradiciones populares. D’esta manera, el videoclip establez un diálogu ente la fiesta prau y la cultura de les raves autoxestionaes: dos formes d’alcuentru nacíes dende la comunidá, organizaes colectivamente y concebíes como espacios de celebración compartida al marxe del ánimu de llucru.
Precisamente, Herbamora estrenaron esta creación audiovisual na Nueche Celta de Granda como homenaxe a les comisiones de fiestes, organizaciones formaes por persones que, de forma voluntaria y altruista dafechu, caltienen viva esta tradición organizando cada añu un bien común pa tol pueblu.
«Anguaño, les fiestes de prau tán viéndose amenazaes, frente a una sociedá cada vez más marcada pol porgüeyu económicu. Les comisiones de fiestes representen ún de los últimos exemplos de la cultura del bien común, la cooperación y el compromisu cola comunidá. Lo mesmo qu’un eclipse, la folixa dura unes hores; pero’l so recuerdu y el vínculu que crea caltiénse munchu más tiempu«, despliquen les componentes d’Herbamora.
‘Eclipse total’ ye un videoclip fechu por La Chiribica, que yá collaboró con Herbamora na creación de los visuales del so espectáculu 286 Llunes. L’equipu técnicu cunta amás cola participación d’Iván de Degaña y Óscar Vega y inclúi la collaboración especial de l’actriz Delia Vega y Mar Rodríguez, periodista de la RPA y nieta de Sena, «La Selenita» de Payares, una muyer de la que la so memoria y heriede formen parte del maxín qu’inspira l’universu d’Herbamora.
Esta obra -que s’estrena’l llunes pa tol mundu en YouTube-, ye’l segundu videoclip qu’acompaña a 286 Llunes, el tercer discu d’estes pandereteres. El primeru d’ellos foi Lluna de collecha, una pieza audiovisual dirixida y realizada por Cortexiphan Producciones y inspirada na distopía feminista El cuento de la criada, obra lliteraria de Margaret Atwood tornada en serie de televisión.
Herbamora, banda formada por cinco muyeres percusionistes y cantantes venceyaes a la cultura tradicional tornaron en payares de 2024 -dempués de 11 años de parón- con 286 llunes, un trabayu discográficu enllenu de presencia y sensibilidá integráu por cinco cantares nos que les percusiones, el xuegu de voces y la electrónica son protagonistes.
Suscríbite a les nuestres novedaes
