El DJ y productor musical asturianu David Manso, residente anguaño en Tenerife, ta acabante d’asoleyar un remix Afro House de la versión de Nuberu del cantar popular ‘Santa Bárbara Bendita’ o ‘En el Pozu María Luisa’, como lu nomó’l grupu integráu por Chus Pedro y Manolo Peñayos. El tema, que yá ta disponible en toles plataformes musicales, llanzóse col sellu Drums Beat Records de Miami. L’artista, amás, ta nomináu a los Premios AMAS.
Nel single, esti himnu venceyáu a la resistencia minera asturiana entemécese colos toques étnicos de la producción electrónica de Manso, que confiesa que ye un llanzamientu especial. «Siempre quixi amestar un trocín de la mio tierra nes mios producciones y, cuando surdió la posibilidá de trabayar cola voz de Chus Pedro, supe que yera’l momentu», comenta’l DJ.
David Manso entamó la so carrera como DJ nel añu 2000 y, dende entós, trabayó nuna bayura d’espacios y festivales d’Asturies, Portugal, Francia, Reinu Xuníu y Canaries; compartiendo escenariu con pernomaos artistes. Nel ámbitu de la producción collabora con discográfiques de Miami, Londres y Nueva York. En 2013 entamó’l proyectu Deep Avenue, un podcast sobre les novedaes de la escena house. Anguaño pue sentise la so música en delles sales de Tenerife.
Suscríbite a les nuestres novedaes
