Pravia, Mieres y Siero centren los eventos del fin de selmana

Música tradicional, canción asturiana, folk celta y baille pa esti fin de selmana nel que va haber cuatro cites que concentren 23 actuaciones: en Mieres el Festival Folclóricu y el Conciertu por Palestina; en Llugones la tercer ronda clasificatoria del XII Concursu de Canción Asturiana Conceyu de Siero y en Pravia el conciertu de José Manuel Tejedor.

La primer de les actuaciones va ser esti vienres 1 de marzu a les 20h nel Auditoriu José Barrera de Pravia. Ellí va actuar José Manuel Tejedor, ún de los gaiteros más reconocíos del país. Los sos trabayos y collaboraciones trespasen fronteres y estilos, amás de les sos composiciones, versionaes polos meyores intérpretes del universu del folk. Va presentar el so trabayu últimu, Lluz.

Pal sábadu Mieres del Camín centra la programación. A les 19h l’Auditoriu Teodoro Cuesta acueye’l Festival Folclóricu qu’entama’l grupu de baille L’Artusu. Xosé Antón Ambás y Ramsés Ilesies van presentar esti eventu fechu n’alcordanza de Darío -pandereteru de Vil.lar de Gal.legos- y nel qu’actúen les agrupaciones folclóriques l’Esbardu d’Avilés, Aires des Barranc d’Algendar (Menorca) y L’Artusu de Figareo.

El Mieres Centru Cultural va enllenase’l sábadu 2 de marzu de solidaridá col pueblu palestinu. De 18.30h a 21.30h celébrase un eventu nel que van actuar Xosé Ambás, 6 Riales, Anabel Santiago, Manolo Peñayos (Nuberu), Sara Muñiz y Eva Rodríguez. Tamién va haber un recital de poesía de muyeres palestines y una esposición de semeyes. El colectivu Asturies con Palestina entama esta actividá que tien un donativu de 5 euros y del que la recaudación va dir destinada a la UNRWA (Axencia de Naciones Unidas pa los Refuxiaos de Palestina n’Oriente Próximu). Les entraes anticipaes puen mercase en La Raposa (Uviéu), La Revoltosa (Xixón) o na puerta’l mesmu día del eventu.

Por último, el domingu 3 celébrase, a les 11.30h y con entrada de baldre, nel Auditoriu CPI Llugones, la tercera xornada clasificatoria del XII Concursu de Canción Asturiana Conceyu de Siero. Participen un total de diez persones: Diego Pérez (Siero), Ángel Fernández (Ayer), Dorinda García (Galicia), Salvador Ondó (Guinea Ecuatorial), Virgilio Pato (Quirós), Fernando García (Siero), Rubén Barredo (Villaviciosa), Alicia Villanueva (Bimenes) y Carlos Velasco (Bimenes); amás de Natalia Martínez (Grau) que compite na estaya moza y de canción vaqueira y Ángel Morán pa la d’ayerana.