El grupu maliayu de post-rock, Melandru, ta estos díes grabando’l que va ser el so segundu EP. Tres de publicar en 2018 un debú homónimu, tienen intención d’asoleyar en primavera d’esti añu el so segundu trabayu formáu por «cinco temes: cuatro inéditos y un quintu que llevamos tiempu tocando en directo y que’l públicu siempre pidió tener grabáu decentemente», adelanta Álvaro Cueto, gaiteru del cuartetu. Amás, esclaria que «l’estilu sigue siendo’l post-rock, pero nesti discu lleva un camín daqué menos escuru; con más contraste ente lluz y escuridá que l’anterior EP».
«Otra de les novedaes ye que va haber un poco más d’instrumentalización, porque dende va tiempu llevamos probando cola electrónica y va tener protagonismu nel discu», añade Cueto a la par que sorraya que la formación va siguir siendo la mesma. «Agora mesmo tamos ilusionaos, llevábamos dende enantes del andanciu col plan de grabar pero ente trabayos y proyectos musicales de caún que fueron espoxigando, nun foi hasta agora cuando nos pudimos sentar y ponenos a ello».
La presentación del discu va ser el 25 de mayu nel Teatru Riera, anque entá nun hai fecha definitiva pa qu’asoleye l’EP. El gaiteru matiza que «si tou va según los planes será pa dempués de Selmana Santa» y añade que yá tienen tres temes «prácticamente finiquitaos».
Un grupu únicu
Melandru debutó nel añu 2018 con un EP formáu por cinco temes de desarrollos llargos (sobrepasen los cinco minutos) y un soníu envolvente, delles veces raspiando lo escuro, onde prima lo instrumental, anque la voz tamién tien el so espaciu. Pente la so instrumentación destaca l’emplegu de la gaita tradicional, que-y aporta personalidá y un toque orixinal, más cuando apaez nun contestu ayenu dafechu a lo tradi. El resultáu final ye un ambiente sonoru averáu al llamáu post-rock, pero con delles testures acústiques qu’aporten el contrapuntu a los pasaxes más crudos; too ello apórta-yos singularidá dientro del rock fechu en llingua asturiana.
Suscríbite a les nuestres novedaes
