Presentaes les I Xornaes del Vigulín Tradicional n’Asturies

Les I Xornaes del Vigulín Tradicional n’Asturies van tener llugar en L’Infiestu los díes 17, 18 y 19 de setiembre de 2021. El proyeutu, presentáu güei nel Ayuntamientu de Piloña, reivindica la tradición del vigulín nel conceyu como una seña d’identidá cultural única dientro’l panorama de la música tradicional asturiana, y naz cola firme voluntá de “convertir Piloña na capital del vigulín tradicional”.

La organización destaca’l bultable númberu d’intérpretes d’esti instrumentu na música popular ente’l sieglu XIX y finales del XX y pretende recuperar una estaya de la música asturiana que “nun tuvo’l xorrecer que sí tuvieron otres manifestaciones como la gaita o’l baille tradicional”

Na programación d’estes xornaes participen delles asociaciones y coleutivos tanto piloñeses como asturianos baxo la coordinación de l’Asociación LaKadarma y l’Ayuntamientu de Piloña

El programa d’actividaes inclúi’l I Cursu El vigulín na tradición asturiana. Repertoriu y técniques interpretatives, impartíu por Dolfu R. Fernández y Rubén Bada; la esposición El vigulín tradicional nel conceyu de Piloña, a cargu del Archivu de la Música Tradicional d’Ambás (ATOAM); la conferencia Acercamientu al vigulín asturianu como instrumentu de tradición popular de Dolfu R. Fernández y los conciertos de los grupos folk Caldo (Galicia) y ¿Aú? (Asturies).

Dexa un comentariu

X