Reportaxe folk de Televisión Centro: II Alcuentros Tradicionales de Trebolgu (2001)

Nesta entrega del AMCA rescatamos un reportaxe especial qu’ellaboró Televisión Centro sobre los II Alcuentros Tradicionales de Trebolgu del añu 2001, un eventu qu’organizaba l’Asociación Folclórico-Cultural Trebolgu d’Uviéu y del que se celebraron diez ediciones con bien d’éxitu de públicu, participación y artistes.

Nos años 90 producíase n’Asturies l’espardimientu de les televisiones llocales, cubriendo la mayor parte de la nuestra xeografía (Uviéu, Xixón, Avilés, Cuenques, Occidente…); foi aquel un procesu que dio estructura audiovisual al país y visibilizó les sos realidaes: política, económica, deportiva, cultural y, tamién, musical.

Naquel momentu vinieron a suplir la non existencia d’un ente de comunicación públicu asturianu, faciendo les veces de tresmisores de tola actividá que se xeneraba nos territorios au llegaba cada emisora en concretu. Una d’elles foi Televisión Centro, que tresmitía pa los conceyos de Nava, Sariegu, Siero, Llanera, Noreña, Uviéu y Xixón, ufiertando información y conteníos sobre los mesmos.

Cartel de la novena edición de los Alcuentros Tradicionales de Trebolgu.

Rescatamos agora un reportaxe especial qu’ellaboraron sobre los II Alcuentros Tradicionales de Trebolgu del añu 2001, un eventu qu’organizaba l’Asociación Folclórico-Cultural Trebolgu d’Uviéu y del que se celebraron diez ediciones con bien d’éxitu de públicu, participación y artistes.

El Parque l’Oeste de la capital asturiana yera’l recintu onde se desenvolvíen, acoyendo actuaciones de grupos folclóricos, bandes de gaites, cuentacuentos, deporte tradicional, tonada y puestos de gastronomía o artesanía; acabando siempre la xornada con un conciertu, pel que pasaron la mayoría de les formaciones folk del país del momentu como N’Arba, Tejedor, Los Gatos del Fornu, La Curuxa, Herbamora, Tuenda, La Bandina’l Tombu, Llangres, Corquiéu o Llan de Cubel, amás d’artistes internacionales como’l gaiteru escocés Fred Morrison o l’acordeonista bretón Alain Pennec, ensin escaecer el rock de Skama la Rede o Dixebra.

Cartel de la décima y última edición de los Alcuentros Tradicionales de Trebolgu.

Nel reportaxe de Televisión Centro pue vese un resume de lo que foron aquellos II Alcuentros Tradicionales de Trebolgu, con imáxenes de la presentación de los mesmos por dellos de los organizadores, entrevistes a los grupos participantes naquella ocasión y fragmentos de les sos actuaciones. Ye esta una bona muestra de lo que pue alcontrase nos archivos d’aquelles televisiones llocales, que guarden la memoria d’un tiempu d’espoxigue musical perimportante.

Dexa un comentariu

X