Presidencia publicó esti vienres nel BOPA la resolución, del 9 de xineru, pola que se reconoz a la xota n’Asturies como Patrimoniu Inmaterial Cultural. El testu destaca el raigañu tradicional del xéneru, un «mou d’espresión musical, vocal y de baille mui popular», estendíu pela totalidá del territoriu asturianu y qu’axunta na so representación una serie d’elementos musicales, de danza, testiles, comunicativos y llingüísticos. La decisión del gobiernu llega depués de la declaración de la xota como manifestación representativa de Patrimoniu Cultural Inmaterial nos diferentes pueblos y tradiciones del Estáu por parte del Ministeriu de Cultura y Deporte, el 4 de xunetu de 2023.
L’espediente, conformáu a partir de dos memories inédites de Yolanda Cerra Bada y Llorián García Flórez, El Cancioneru l’Andecha: la jota n’Asturies (2003) y otros documentos fotográficos y audiovisuales, percuerre distintos aspeutos de la xota y les sos representaciones. Reconoz el papel fundamental de los y les bailladores d’antaño y d’anguaño, les informantes, los grupos de baille, les xuntances de música tradicional y el fenómenu de les nueches en danza nes xeres de caltenimientu y tresmisión de la práctica del baille a lo suelto, ensin escaecer el protagonismu de la pandereta, «fuertemente vinculada a les muyeres y a les minoríes LGTBQ+» nel espoxigue de les tradiciones y les nueves formes de socialización nel baille. Recuerda, amás, la so evolución histórica y les acciones que llevaron a la recuperación de les formes tradicionales depués de la Dictadura.
Dende l’aprobación de la Llei de Patrimoniu Cultural en 2001, espresiones etnográfiques non materiales como la misa de gaita, l’Asturianada, el Corri-corri y Los Sidros y Les Comedies de Valdesoto foron declaraes Bien d’Interés Cultural por tratase de manifestaciones relevantes na identidá asturiana. Pasos importantes pa la so protección como’l que-y llega agora a la xota, simbólicos, que nun siempre se traducen n’acciones concretes y efeutives.
Por una tresmisión institucional
La primer década del sieglu XXI n’Asturies traxo, gracies al impulsu y trabayu de les persones y coleutivos venceyaos al folclor, el desendolcu de polítiques públiques empobinaes non solo a la protección sinón a la difusión de la tradición oral del país. Sicasí, la falta de medios y de voluntá política llevó a l’amenorgamientu de proyeutos como l’Archivu de la Música Tradicional del Muséu del Pueblu d’Asturies o el completu abandonu del Archivu de Música d’Asturies -agora namás un pantasma-. Quiciabes seya tiempu de que les instituciones s’impliquen, más alló de lo símbolico, na investigación y divulgación del nuesu patrimoniu.
Suscríbite a les nuestres novedaes
