Yá ta en toles plataformes el tercer cenciellu de Guieldu

Tres d’estrenalu ayeri n’esclusiva na canal de YouTube de musicasturiana.com, Guieldu llancen en toles plataformes musicales el so tercer cenciellu: Flor d’Artu. Como yá ficieren colos anteriores L’Aremu y Perdayuri, la formación celta presenta dos temes, remembrando asina a los singles de 45 rpm: “Flor d’artu”, que-y da títulu, y “Angueira”. Pa la ocasión cuntaron cola destacada collaboración del músicu Pepín de Muñalén, ún de les figures más apreciaes de la escena folk asturiana, qu’apurre unes llinies de saxu mui arriquecedores.

Dende les primeres notes del tecláu sintetizador y la guitarra acústica, “Flor d’artu” remembra los soníos que caracterizaron al llexendariu sellu discográficu Windham Hill y a grupos como los irlandeses Nightnoise que supieron amestar la música tradicional y progresiva, acústica y eléctrica. El tema evoluciona dende la melodía d’una popular tonada asturiana, “Coyí d’un artu una flor”, pa dir escontra un paisaxe musical de nueva composición con influxos de smooth jazz, funk y blues que l’asitien na esfera de la celtic fusion, daqué distinto al tratamientu que suel facese a la música asturiana de raigañu.

Per otru llau, “Angueira” podría ser el “Puirt à Beul” de la Raya Carboneira, magar, curiosamente, la lletra foi recoyida na rexón portuguesa de Tras-Os-Montes onde pervive’l mirandés y otres llingües de raigañu asturlleonés. El tema constrúise sobre un groove complexu creáu a partir de la rítmica del bouzouki irlandés, el slap del baxu eléctricu, los teclaos y la batería, dando-y un distintivu color funk al soníu, mui al estilu pop-rock de los últimos años 80 y primeros 90, que s’acentúa especialmente cuando llega’l solu de saxu.

Conciertu nel Semando Fest

Con esti cenciellu nuevu, Guieldu amuesen la so versatilidá y calidá compositiva. Flor d’Artu ye l’adelantu del primer discu que la banda ta anguaño grabando y la so publicación sirve tamién pa calecer l’ambiente con vistes al so conciertu nel II Semando Fest, el festival de música moza n’asturianu que va celebrase’l 9 de febreru en Lata de Zinc y del que yá queden poques entraes a la venta.

Siéntilu nes plataformes musicales

Merca la entrada pal II Semando Fest

Dexa un comentariu

X