La tonada y la poesía feminista de Sandra Álvarez y Noemí González, primera confirmación del II Semando Fest

El vienres 9 de febreru de 2024 en Lata de Zinc (Uviéu) va celebrase’l II Semando Fest, festival de música moza n’asturianu qu’entama Musicasturiana.com y Ixuxú Cultura. Nél van participar cuatro proyectos d’estremaos estilos musicales cola característica en común de que la mayoría de los sos componentes son menores de 34 años. La primera confirmación ye la de Sandra Álvarez y Noemí González, que van ufrir un recital qu’axunta tonada y poesía feminista contemporánea.

La bonísima acoyida que tuvo’l conciertu del Alicia Villanueva y Luis Álvarez Pola na primer edición del Semando Fest, amosó qu’hai interés ente’l públicu por sentir asturianada, faciéndolo amás n’otros contestos estremaos a los qu’onde normalmente se pue sentir el cantu más identificativu del pueblu asturianu. Por eso la organización decidió puxar otru añu más por esti xéneru musical y incluir dientro de la programación a una de les nueves cantadores qu’hai nel país, Sandra Álvarez.

Acompañada por Noemí González, les dos moces xixoneses faen una propuesta na qu’intenten averar la poesía contemporánea al folclor tradicional asturianu calteníu poles muyeres a lo llargo los sieglos. Por ello, les lletres de Noemí G. céntrense en visibilizar los procesos propios de les muyeres y los sos cuerpos y acompáñense de la sensibilidá na interpretación de Sandra Álvarez, cantante de ronda y tocadora.

Siguiente confirmación

Con un diseñu fechu pola diseñadora carbayona Beatriz Menéndez col so proyectu Made in Chigre -autora de tola identidá visual d’esti II Semando Fest-, anúnciase esta primer confirmación, a la que van siguir les demás nes prósimes tres selmanes. Xuntes, van completar el cartelu d’una iniciativa que nagua por puxar pol relevu xeneracional na música asturiana; por ufrir un festival con un formatu orixinal qu’entemeza aspectos d’una gala colos d’un conciertu al usu; que reivindica les sales de conciertos como un espaciu afayadizu pal exposigue de la música de raigañu; y qu’apuesta por da-y oportunidaes a les y los creadores xóvenes.

Dexa un comentariu

X