Xixón, Uviéu y Siero acueyen les cuatro cites cola música n’asturianu qu’hai esti fin de selmana. En Xixón celébrase de vienres a domingu el festival Escenines pa la reciella qu’entama l’asociación de families pol asturianu Reciella; Dixebra da’l so tradicional conciertu de navidá na sala Tribeca Live d’Uviéu y La Pola acueye’l conciertu solidariu Siero con Palestina.
En Xixón, el Centru de Cultura Antiguu Institutu acueye a les 19h l’espectáculu Cantares de… y pa neñ@s, una propuesta pensada pa públicu familiar na que Fernando Valle Roso y Silvia Moreno, acompañaos de Satur Vega, ufierten cantares tradicionales adaptaos a la reciella.
La nueche sigue n’Uviéu, onde la banda Dixebra va xubir al escenariu de la sala Tribeca Live a les 21h. El grupu, ún de los referentes históricos del rock asturianu, va repasar los sos cantares más conocíos nel tradicional conciertu qu’ufren tolos años pa zarrar l’añu y aprovechar la visita a Asturies de les «lleendes urbanes«.
La mañana del sábadu ta dedicada tamién a les families. A les 12h, el patiu del Centru de Cultura Antiguu Institutu de Xixón, acueye’l conciertu-presentación de conciertu-presentación del llibru-discu Pop Piquiñín. Una escoyeta de les canciones n’asturianu de Petit Pop. Les puertes abren venti minutos enantes de qu’entame y la entrada ye llibre hasta enllenar l’aforu.
Yá pela tarde a les 19h, el Teatru Auditoriu de La Pola, en Siero, va ser l’escenariu del conciertu solidariu Siero con Palestina. L’actu va xuntar distintos proyectos musicales como Ún de Grao, Soi Panderetera o’l Coru Al Altu la Lleva, nuna cita que combina música tradicional, reivindicación y solidaridá.
Suscríbite a les nuestres novedaes
