Rodrigo Cuevas anuncia nueva fecha nel Niemeyer tres escosar les entraes
Tres el doble sold out pa esti avientu nel Teatru de La Llaboral de Xixón, Rodrigo Cuevas vuelve a arrasar. Güei a les doce’l mediudía salieron a la venta les entraes pal so conciertu del 9 de marzu nel Centru Niemeyer d’Avilés y en quince minutos yá escosó toles entraes. A partir de mañana xueves 16, a les 11h la mañana, salen les entraes a la venta pa la nueva fecha n’Avilés: vienres 8 de marzu. Ye una amuesa más del éxitu históricu qu’esti músicu ta teniendo col so discu Manual de Romería y el so espectáculu, La Romería, que tien pel momentu 13 feches más de xira anunciaes y tán cuasi toes coles entraes escosaes.
Manual de Romería ye l’esperáu segundu trabayu de llarga duración del axitador folclóricu, el rei del cortexu, el llabrador d’una Asturies diversa y arguyosa de la so identidá rural, l’animal escénicu. Rodrigo Cuevas presenta 14 cantares enllenos de sensualidá y fuerza, de romería, d’electrónica retro, de folclore que tresciende a les llendes asturianes, de mensaxe disfrutón, costumista y comprometíu a la par; seya n’asturianu, en castellanu, n’amestáu o en francés.
El discu ta grabáu y producíu por Eduardo Cabra “Visitante”, músicu , compositor y productor de la pernomada banda puertoriqueña Calle 13. Y nél, Rodrigo Cuevas fai esi viaxe que tantes xeneraciones d’asturianos fixeron nel pasáu; dende l’Asturies rural hasta Llatinoamérica, faciendo d’enllaz ente les imprescindibles voces de la tradición que suenen nel trabayu –Mariluz Cristóbal Caunedo, Edelio González Fernández, Josefa Diebra Faúndez y Nieves Rodríguez Cañón– y los instrumentos y coros de músicos del otru llau de la mar, ente los que destaca la voz d’iLe -que tamién fuera vocalista de Calle 13- y instrumentos como’l cuatro venezolano, charango, roncoco o tres. Tamién tien el so protagonismu la veterana agrupación coral corsa A Filetta y José González “El Presi”, sampleáu nún de los temes.
Un álbum nel que Rodrigo Cuevas afítase como ún de los artistes cimeros de la so xeneración, tanto dientro como fuera d’Asturies, gracies a un proyectu interdisciplinar articuláu alredor de la música, pero onde lo perfomativo, lo representativo y lo audiovisual tamién son pegollos de la propuesta.
