Rubén Alba publica’l so segundu discu: ‘Secretos sin contar’

Yá ta a la venta Secretos sin contar, el segundu trabayu del prestixosu gaiteru Rubén Alba. L’avilesín regresa con un trabayu más folk, nel que soníos pop y rock entemécense con melodíes de composición propia y que cunta con collaboraciones destacaes como les d’Eva Tejedor, Javi Tejedor, Juan Duarte (Vrienden, Juanillous 2.0), Salva (Deira), Rubén Díaz (Rarefolk) y l’escocés Mohsen Amini. Alba y la so banda va presentar en directo‘l discu esti sábadu 4 na Casa la Cultura d’Avilés, a les 20h y con entrada de baldre.

Tres de llanzar los singles d’adelantu “Resiliencia” y “Cabo Vidio“, yá puen sentise los doce temes que formen la segunda referencia de Rubén Alba. El gaiteru regresa con esti trabayu que va un pasu más allá del so debú Despertar y nel que tamién destaca la inclusión de tres cantares: dos n’asturianu y ún en castellanu. Con esti álbum, l’avilesín sigue avanzando nuna carrera que lu llevó a ganar cuatro vegaes el premiu Remis Ovalle, dos vegaes el Trofeo MacCrimmon del Festival Intercélticu de Lorient. amás d’otra montonera premios dientro d’una trayectoria qu’Alba entamó con namás 11 años.

El so virtuisismu tamién lu llevó a ser escoyíu p’actuar como gaiteru solista nel prestixosu festival Piping Live Festival celebráu en Glasgow en 2012 y tien collaborao como solista con artistes como Gwendal o Juan Carlos Mendoza (músicu d’Hevia, Cristina de Valle,  Ana Belén y Amistades Peligrosas ). Con esti trabayu y el conciertu del sábadu va sentise la so capacidá como compositor, gracies a que Secretos sin contar ta formáu dafechu por temes de composición propia. Na puesta de gala d’esti segundu trabayu va haber amás collaboraciones d’Eva Tejedor & Les Pandereteres y d’otros nomes ensin desvelar que van conocese dende les 20h na Casa la Cultura d’Avilés. La entrada ye gratuita hasta completar aforu.

Mercar discos de Rubén Alba na tienda online

Siento los singles en YouTube

Dexa un comentariu

X