Sastre llanza’l so primer cantar n’asturianu: “Funeres s/n”

El pasáu vienres estrenóse en toles plataformes musicales y asoleyó’l videoclip de “Funeres s/n“, el primer tema n’asturianu que publica’l cantautor xixonés Sastre. El cantar usa como lletra un poema de Daniel García Granda n’homenaxe a la memoria de los nueve militantes comunistes y socialistes asesinaos en 1948 poles autoridaes facistes y tiraos al Pozu Funeres de Llaviana, siendo esti ún de los actos más xabaces de la represión franquista n’Asturies.

Esti cantar forma parte del segundu álbum de Sastre, que va asoleyar el 17 de mayu col títulu de Familia de Sastre. Trátase del tercer single d’adelantu y tien un tonu más solenme, apropiáu p’acompañar al testu, amás d’un soníu cercanu al folclore asturianu, que pue acercalu en cierta manera a proyectos como Lucas 15. Amás, el tema ta reforzáu pola collaboración del coru Al Altu la Lleva, formación que suel andechar con Nacho Vegas y de la que’l propiu Sastre ye miembru.

“Funeres s/n” ta interpretada por Charlie Rodríguez (guitarra eléctrica), Rodrigo Roces (pianu), Elisa Gómez (baxu), Diego Reyes (batería y percusiones), Sastre (voz, guitarra ecuatoriana, acústica y eléctrica) y el coru Al Altu la Lleva. Foi grabada y amestada por Diego Reyes y masterizada por Matt Brown en Space Ranch Studios, Seattle.

N’alcordanza a les víctimes

«N’homenaxe a la memoria de les persones asesinaes polos facistes, azotaes al Pozu Funeres en 1948, que llucharon polos valores republicanos pa llibrar al país de la dictadura y fueron executaes por cuenta d’ello». Con estes pallabres Sastre presenta’l cantar, amás de facer alcordanza de los nomes de les víctimes y la so militancia política: «Erasmo Alonso Martínez, comunista; Fernando Carrio Martínez, comunista; Caferino González Concheso, comunista; Fermín Concheso Alonso, comunista; Antonio González García, sin adscripción política; Ramón Rodríguez Argüelles, socialista; Jesús García Iglesias, socialista; Enrique Suárez Fernández, socialista, y Silvino Díaz Menéndez, socialista».

Dexa un comentariu

X