L’avilesín Rubén Alba ye ún de los integrantes de la tercer xeneración de gaiteros surdida depués del boom qu’esti instrumentu esperimentó nos años 80. Principió la so formación con once años, integrándose na Banda de Gaites Tabladar, dirixida por José Manuel Tejedor; con dieciocho años (2002) proclamábase ganador del prestixosu Tornéu Macallan del Festival Intercélticu d’An Oriant/Lorient, gallardón que volvería a ganar nel 2006. A lo llargo de los sos más de trenta años tien collaborao con bien de compañeros y compañeres de la música asturiana, presentándose como intérprete solista nel 2018 col trabayu discográficu Despertar, nel que publica un conxuntu de pieces de calter folk-rock con un soníu compactu y puxante.
La segunda entrega del so llabor llega agora, repitiendo prácticamente la banda que lu acompaña, nomes perbién conocíos na escena musical del país. Secretos sin contar, títulu del álbum, presenta delles novedaes respecto al anterior, anque la producción y el soníu siguen na mesma llinia. Esta entrega nueva entemez intensidá y momentos más seles y melódicos, con pasaxes rockeros y otros na onda del folk más avezáu. Pa conocer más detalles punxímonos en contactu col músicu y estes foron les sos respuestes.
¿Cómo te planteguesti esti trabayu nuevu?
Llevo trenta años tocando y siempre fui un gaiteru con ganes de xubir al máximu exponente la gaita asturiana, pa eso, arrodiéme de los músicos que pa min meyor entienden la música que faigo: Rubén Álvarez, Richard García, Juan Carlos Vega, Aitor Herrero, Marcos García, Nel de Purnea, y el productor Luis Senén.
«Como novedá, introduzo tamién la electrónica y cuento con collaboraciones mui especiales como les d’Eva Tejedor, Juanjo Díaz, Salvador Daza o Mohsen Amini»
¿Qué novedaes presenta respectu al anterior?
Creo que ye un discu frescu, con pieces pa escuchar, pa blincar, pa llorar… ta pensáu pa tou tipu de públicu, pero enfocáu especialmente hacia la xente mozo. Amás incluyo tres cantares, introduzo tamién la electrónica, cuento con collaboraciones mui especiales como les d’Eva Tejedor (voz), Juanjo Díaz (percusiones), Salvador Daza (violinista de Deira) o Mohsen Amini (concertinista de bandes como Ímar o Talisk), escoyíu Meyor Músicu Xoven Tradicional nel 2016 pola BBC Escocia, siendo la primer vez que collabora con un músicu asturianu.
«Ye un discu frescu, con pieces pa escuchar, pa blincar, pa llorar… ta pensáu pa tou tipu de públicu, pero enfocáu especialmente hacia la xente mozo»
Amás de la gaita nótase tamién un protagonismu d’instrumentos como l’acordión o la trompeta, qu’aporta un timbre mui especial.
La trompeta y l’acordión interpreten melodíes centrales nes pieces nes qu’apaecen, porque al final sabemos toos que la gaita acaba aburriendo y cuando escuches un tema, pues val, pero cuando faes un discu d’unos cincuenta minutos de música creada por un gaiteru, les melodíes hai que cambiales o sustituyir la gaita por otros instrumentos. La combinación de gaita, acordión, trompeta, guitarra eléctrica y acústica, teclaos, baxu, batería… ye arriesgao, son ingredientes difíciles de cocinar, pero creo que tengo un productu mui ricu y con munchos nutrientes pa tolos oyíos.
Sintiendo’l discu aldovínense influyencies d’otros intérpretes, tanto asturianos como internacionales.
Nesti trabayu nuevu tolos temes son de composición orixinal, con munches influyencies de tola música que llevo escuchando dende bien neñu hasta güei: Tejedor, McGoldrick, Gordon Duncan, Wolfstone…
«Nesti trabayu nuevu tolos temes son de composición orixinal, con munches influyencies de tola música que llevo escuchando dende bien neñu hasta güei»
Paez que depués d’un boom de la gaita, na que bien de gaiteros publicaben discos en solitario, agora esti instrumentu aparentemente perdió protagonismu nel contestu de la música asturiana en favor d’otros, especialmente la pandereta.
Tocante al protagonismu de la gaita n’Asturies… creo que ye too cuestión de tendencies, o de modes, lo que ta claro ye que la gaita asturiana nun puede morrer, por eso sigo faciendo música de gaita y sobre too enfocáu a un públicu xoven, a esos gaiteros mozos con ganes de facer coses diferentes y nun ser tan puristes… Ye mui significativo, por desgracia, que’l mio discu seya una de les poquísimes muestres de la música asturiana de gaita de los últimos años.
«La gaita asturiana nun puede morrer, por eso sigo faciendo música de gaita y sobre too enfocáu a un públicu xoven, a esos gaiteros con ganes de facer coses diferentes»
¿Cómo ves el futuru?
Lo que quiero ye que cuando yo seya un güelín y tenga 70 ó 80 años ver nuna Nueche Folk o onde seya que puxé por un instrumentu que pienso que nun tien que morrer. Ye que como sigan asina les coses… esto va acabar. Conque esperemos que seya cíclico y que la gaita vuelva a tener la importancia y la creatividá que merez.
Suscríbite a les nuestres novedaes
