Cumplir dos décades meciendo ska, punk, folk y reivindicación merecen una bona celebración y Skama la Rede van celebralo con una folixa-conciertu que promete ser una fecha difícil d’escaecer pa tolos siguidores de la escena de rock n’asturianu. El vienres 20 de marzu los Kuivi Almacenes d’Uviéu van acoyer esta fiesta de cinco hores de duración na que Skama la Rede van tocar xunto a una decena de collaboradores dos hores y DJ Avante’l Pueblu pon la música del pre y postconciertu. Les entraes yá tán a la venta por ocho euros.
«Pal 15 aniversariu entamemos un conciertu especial na Casa del Pueblu de la CNT de Candás. Foi dalgo más d’andar per casa y con dalgunes collaboraciones. P’agora queríemos ser más ambiciosos y namás nos decidimos a facelo si se daben les condiciones de tener una fecha nos primeros meses del añu y una bona sala. Ehí surdió la oportunidá de facelo nel Kuivi, con aforu pa 500 persones, y con infraestructura p’acoyer daqué guapo«, desplica Miguel Fernandi «Burilo» alredor d’esta entamada.
Nel conciertu de Skama la Rede el músicu avanza que «va haber cantares de toles dómines, con más d’una decenes de collaboradores; cantantes y músicos», anque entá nun quier desvelar nengún nome pa nun «gafar a los convidaos». Sicasí, la idea del grupu «ye que tea tola xente que participó nel discu últimu y otres persones de la escena asturiana, amás de collacios de fuera d’Asturies que tienen una predisposición total a venir pero que tendremos qu’esperar un poquiñín pa confirmalos porque tán pa entamar les sos xires a nivel estatal».
«La intención que tenemos ye grabar el conciertu a trés cámares. Non pa editalu enteru pero sí pa poder asoleyar dalgunes cosuques«, añade’l vocalista de Skama la Rede que desplica que «los diez euros d’entrada na puerta, y ocho euros antemanada son fundamentalmente pa cubrir los gastos que lleva un eventu d’estes característiques«. Nun hai nada que xustificar; la cita va ser única y el músicu namás pide una cosa pa ella: «que la xente venga con gana de pasalo bien».
Esti conciertu ye la continuación de los actos de celebración de los venti -y pico- años que’l grupu lluanco-candasín-maliayu lleva enriba les escenarios. Un cumpleaños que tuvo como fechu principal la publicación de 20 Años, un vinilu-llibru qu’inclúi los ocho cantares que’l grupu compuso dende’l so álbum anterior, Avante, cola particularidá de que dalgunos d’ellos inclúin la collaboración a la voz de Pirri (Escuela de Odio), Ramón Blanco (Los Berrones) ,Daviz Rodríguez (Mala Reputación), Humber (Misiva) y Raquel (Ochobre).
Amás, el vinilu vien acompañáu d’un llibru que resume la historia de la banda a traviés de testos de David Artime “Roxu” (periodista, escritor y lletrista del grupu), Xune Elipe (productor musical y cantante de Dixebra), Xicu Ariza (periodista y director de musicasturiana.com), Natalia González (llibrera, gaitera d’Ochobre y presentadora del actu), Nuno Feliz (fotógrafu y collaborador del FIMI Lisboa) y Gabri Reigosa (cantante de Dakidarría). Too ello con semeyes de dellos autores, recortes de prensa y entraes de los últimos venti años.
Suscríbite a les nuestres novedaes
